Konungs­hjónin tóku á móti Höllu og Birni

Þá hófst formlega þriggja daga heimsókn Höllu til Svíþjóðar.

Samkvæmt vef forseta Íslands mun Halla eiga fund með með forseta löggjafarþingsins, Andreas Norlén, ásamt utanríkisráðherra og öðrum sendinefndarmönnum að móttökuathöfninni lokinni. Síðan mun Halla funda með Ulf Kristersson forsætisráðherra Svía. Þau tvö munu svo ræða við fjölmiðla. Að því loknu mun Halla og fylgdarlið skoða varðbát í eigu sænsku Landhelgisgæslunnar, fræðast um starfsemi hennar og sigla um skerjagarðinn.

Á sama tíma mun Björn Skúlason fara með Silvíu drottningu í heimsókn á Silviahemmet, sem er dagvistunarúrræði sem drottning stofnaði fyrir fólk með heilabilunarsjúkdóma, en eiginmaður forseta er verndari Alzheimer-samtakanna á Íslandi. Alma Möller heilbrigðisráðherra og Anna Tenje, ráðherra öldrunarmála í Svíþjóð, verða með í för. Drottningin mun einnig fylgja Birni og heilbrigðisráðherra í Barnahus, sem er barnaverndarúrræði að íslenskri fyrirmynd.

Fram kemur að dagskrá dagsins í dag muni ljúka með hátíðarkvöldverði í Konungshöllinni.

Þó að heimsóknin hafi formlega hafist í dag þá hittu forsetahjónin Viktoríu krónprinsessu og Daníel prins í gær. Þá gengu þau meðal annars um skúlptúrgarð Estellu prinsessu.