Tekist á um að­gerðir ríkis­stjórnar á Al­þingi

Kristrún Frostadóttir formaður Samfylkingarinnar óskaði verkalýðshreyfingunni til hamingju með samningana og fagnaði áherslu á strerkari tilfærlukerfi. Hún gæti hins vegar varla óskað ríkisstjórninni og fjármálaráðherra til hamingju.

„Útgjaldahliðin er flott en það er engin fjármögnun. Við getum ekki annað en gagnrýnt það. Ekki bara út frá þensluáhrifum heldur ekki síður ráðrúmi ríkisins til að veita þjónustu þegar fram í sækir,“ sagði Kristrún.

Þórdís Kolbrún R. Gylfadóttir fjármálaráðherra sagði að ekki stæði til að fjármagna aðgerðir stjórnvalda með skattahækkunum.

„Er það gert með því að auka á hallann eingöngu? Nei. Er það gert með því að hækka alls konar skatta á sömu hópa og voru að ná saman í kjaraviðræðum til næstu fjögurra ára? Nei. Er hægt að fara í aðgerðir til að spara í kerfinu? Já,“ sagði fjármálaráðherra.

Þorgerður Katrín Gunnarsdóttir formaður Viðreisnar sagði engan fyrirsjáanleika í aðgerðum stjórnvalda.

„Síðan er blaðamannafundur núna við að kynna kjarasamningana og ekki talað skýrt um það hvernig ríkissjóður ætlar að fjármagna sína aðkomu. Það er svona uml um að það eigi að beita aðhald í ríkisrekstri. Hugsanlega fara í sameiningar. Þessi ríkisstjórn hefur enga afrekaskrá þegar kemur að aðhaldi í ríkisrekstri,“ sagði Þorgerður Katrín.

Katrín Jakobsdóttir forsætisráðherra sagði mikla ánægju ríkja í samfélaginu með þá kjarasamninga sem gerðir hefðu verið. Það væri helst að óánægju gætti hjá stjórnarandstöðunni.

„Hvernig ætlum við að fjármagna þetta? Við munum kynna fjármálaáætlun þar sem gert er ráð fyrir þessu. Við höfum talað algerlega skýrt. Þetta er okkar forgangsmál. Það er okkar forgangsmál að skapa hér forsendur til að unt verði að draga úr verðbólgu og að vextir verði lækkaðir,“ sagði forsætisráðherra.

Útlendingamál í ólestri

En það var rætt um fleira í Alþingi í dag. Inga Sæland formaður Flokks fólksins stóð fyrir sérstakri umræðu um fíkniefnavanda þar sem heilbrigðisráðherra var til svara.

Sigmundur Davíð Gunnlaugsson spurði hins vegar dómsmálaráðherra um útlendingamálin út frá meintri óstjórn í þeim málaflokki. Nú boðaði ráðherra enn eitt frumvarpið um útlendingamál þegar nýbúið væri að kynna einhvers konar heildaráætlun stjórnvalda í útlendingamálum.

„Kostulegt plagg sem var þó kynnt með pompi og prakt á blaðamannafundi og snérist nú aðallega um að rekja óskalista Vinstri grænna um hvernig mætti auka þjónustu við hælisleitendur og auka aðdráttarafl landsins í þeim efnum auk hefðbundinnar froðu. En rétt í lokin var getið um að Sjálfstæðisflokkurinn fengi að klára nýtt lítið útlendingamál,“ sagði Sigmundur Davíð.

Guðrún Hafsteinsdóttir dómsmálaráðherra sagði undarlegt að formaður Miðflokksins gagnrýndi að loks væri búið að móta heildarstefnu í útlendingamálum.

„Það er oft og iðulega sem gerðir eru fyrirvarar við stjórnarfrumvörp í þinglegri meðferð. Ég hef ekki áhyggjur af því að félagar mínir í Vinstri grænum muni ekki standa við þá vinnu sem þau hafa lagt heilmikla vinnu í. Ásamt Framsóknarflokknum og Sjálfstæðisflokknum í þessari heildarsýn sem kynnt var hér fyrir nokkrum vikum síðan,“ sagði Guðrún Hafsteinsdóttir.