Ís­land ætli ekki að draga sig úr keppni í Euro­vision

Í kvöldfréttum Rúv sagði Stefán Eiríksson, útvarpsstjóri Ríkisútvarpsins, að tugir erinda hefðu borist inn á borð Rúv þar sem stofnunin væri hvött til að draga Ísland úr keppninni en gagnrýni hvað varðaði þátttöku Ísraels væri ekki ný af nálinni. 

Málið hefði verið rætt en engin skilyrði hafi verið sett fyrir þátttöku Íslands af hálfu stjórnvalda eða Ríkisútvarpsins. Rúv hefði tekið þátt í keppninni síðan 1986 og stefnt væri á að gera því áfram.

„Við höfum auðvitað bara farið vel yfir stöðuna og komið áhyggjum okkar á framfæri við EBU og í samtölum okkar við aðra aðila, að þá öryggismálum í keppninni þegar hún verður haldin í maí,“ sagði Stefán í frétt Rúv.

Þá taldi Stefán að ekki væri verið að taka pólitíska afstöðu með þátttöku í keppninni og þátttaka Rúv hefði ekkert með pólitíska afstöðu að gera. Jafnframt væri það ekki hlutverk Rúv að taka pólitíska afstöðu.

Rúss­um vísað úr keppni en ekki Ísraelum

Rússlandi var vísað úr Eurovision í kjöl­far inn­rás­ar þeirra í Úkraínu í febrúar 2022. Upphaflega stóð til að leyfa Rúss­um að taka þátt að óbreyttu árið 2022 en þeim var hent úr keppn­inni eft­ir að Finn­ar hótuðu að draga þátt­töku sína til baka vegna ákvörðun­ar­inn­ar.

Í kjölfarið til­kynntu fleiri for­svars­menn nor­rænna sjón­varps­stöðva, þar á meðal Stefán, að þau hygðust einnig draga þátt­töku sína til baka fengi Rúss­land að taka þátt.

„Við telj­um það óá­sætt­an­legt að Rúss­ar taki þátt í Eurovisi­on,“ sagði Stefán þá um málið.