Sif og Söndru þakkað fyrir á Laugar­dals­vellinum í kvöld

Á landsleik Íslands og Finnlands, sem fram fer á Laugardalsvelli í kvöld, verður Sif Atladóttur og Söndru Sigurðardóttur þakkað fyrir þeirra framlag til íslenska landsliðsins í gegnum árin. Þetta kemur fram á heimasíðu KSÍ.

Leikur Íslands og Finnlands hefst klukkan 18.00 og verður fylgst með gangi mála hér inn á Vísi.

Sif og Sandra hafa báðar lagt landsliðsskóna á hilluna eftir að hafa verið partur af landsliðinu í fjölda ára. Báðar voru þær mjög lengi lykilleikmenn í varnarleik íslenska liðsins.

Sif spilaði sinn fyrsta leik árið 2007 og þann síðasta á EM á Englandi í fyrra. Sif spilaði samtals 90 leiki og hefur hún tekið þátt í öllum stórmótum sem liðið hefur farið á sem eru fjögur talsins.

Sandra spilaði sinn fyrsta leik árið 2005 og þann síðasta í febrúar á þessu ári. Samtals spilaði Sandra 49 leiki og hefur, eins og Sif, tekið þátt í öllum stórmótum sem liðið hefur farið á.

Knattspyrnusamband Íslands notaði tækifærið go þakkaði Sif og Söndru kærlega fyrir þeirra framlag til Íslenska landsliðsins í gegnum árin.