Á slysadeild eftir líkamsárás fjögurra á aldrinum 17 til 20

Greint var frá árásinni í tilkynningu frá lögreglu í morgun. Heimir Ríkarðsson lögreglufulltrúi segir í samtali við fréttastofu að um sé að ræða drengi sem hafi ítrekað komið við sögu hjá lögreglu. Barefli var beitt við árásina.

„Það var ráðist á einn aðila á svipuðum aldri, sá fór uppá slysadeild og þar var gert að sárum hans. Líðan er eftir atvikum en hann fór heim í gær,“ segir Heimir.

Hann vildi ekki staðfesta hvers konar barefli hafi verið beitt. Tilkynning barst lögreglu á níunda tímanum frá vegfaranda í Mjóddinni.

Stutt er síðan tveir karlmenn, fæddir árið 2005, voru handteknir grunaðir um hættulega líkamsárás.

Hafið þið orðið varir við aukið ofbeldi hjá ungmennum síðustu misseri, vor og sumar?

„Þetta gengur í bylgju eins og annað en eitt mál er einu máli of mikið,“ segir Heimir.