Erlent

Aldraða konan sem var skotin með rafbyssu er látin

Samúel Karl Ólason skrifar
Clare Nowland er sögð hafa látist á sjúkrahúsi í dag.
Clare Nowland er sögð hafa látist á sjúkrahúsi í dag.

Eldri áströlsk kona sem skotin var með rafbyssu á dögunum er látin. Lögregluþjónn hefur verið ákærður fyrir að skjóta hina 95 ára gömlu Clare Nowland með rafbyssu þegar hún nálgaðist hann hægt á göngugrind en með hníf í hendi.

Samkvæmt fjölmiðlum í Ástralíu lést Nowland á sjúkrahúsi í dag umkringd fjölskyldu sinni. Fyrr í dag var tilkynnt að lögregluþjónn hefði verið ákærður fyrir að skjóta hana með rafbyssu.

Umrætt atvik átti sér stað í bænum Cooma í Nýja Suður-Wales í Ástralíu í síðustu viku. Lögregluþjónar voru þá kallaðir til hjúkrunarheimilis þar sem Nowland var sögð óróleg og með hníf.

Tveir lögregluþjónar mættu á vettvang en þá hélt Nowland á steikarhníf. Lögreglustjórinn Peter Cotter segir að Nowland, sem var 43 kíló að þyngd, hafi neitað að leggja hnífinn frá sér og hún hafi verið að nálgast lögregluþjónana tvo, hægt, á göngugrind.

Þá skaut lögregluþjónninn Kristian White hana með rafbyssu. Nowland féll í gólfið og höfuðkúpubrotnaði og blæðingu inn á heila.

Ríkisútvarp Ástralíu sagði frá því í morgun að White hefði verið ákærður fyrir að skaða Nowland og að sú ákvörðun hafi verið tekin í kjölfar ítarlegrar rannsóknar. Ekki liggur fyrir hvaða áhrif dauðsfall Nowland mun hafa á ákærurnar gegn White. 

Sjá einnig: Heita því að hlífa engum eftir að öldruð kona með heilabilun var beitt rafbyssu

Karen Webb, yfirmaður lögreglunnar í Nýja Suður-Wales, sagði blaðamönnum í morgun að mikilvægt væri að samfélagið gæti treyst lögregluþjónum. Það sé hægt að treysta lögregluþjónum og þetta sé eitt atviki af um tveimur milljónum útkalla á ári hverju.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×