1,2 milljón krónur safnast í söfnun Eddu á Karolina Fund

Þrettán dagar eru eftir af söfnuninni en 42 einstaklingar hafa þegar lagt henni lið.

Yfirlýst markmið söfnunarinnar er að gera Eddu kleyft að áfrýja nýföllnum dómi þar sem henni var gert að greiða móður viðmælanda  miskabætur og málskostnað vegna hljóðbrota sem spiluð voru í hlaðvarpsþættinum Eigin konur, þar sem dóttir konunnar greindi frá ofbeldi móðurinnar.

Á Karolina Fund segir í texta að mikilvægt sé að það náist að safna 2,5 milljónum til að standa undir kostnaði en markið í söfnuninni er hins vegar aðeins 10 þúsund evrur, rúm 1,5 milljón króna.

„Móðirin vann málið og eins og við túlkum það fær hún í kjölfarið miskabætur fyrir „skaðann“ sem hún hefur orðið fyrir á einkalífi sínu eftir að upptakan, sem dóttir hennar færði fram til að sanna að hún hefði verið beitt andlegu ofbeldi, var spiluð,“ segir á Karolina Fund. 

„Íslenskt réttarkerfi er sannarlega dæmi um það hvernig sannleikurinn getur verið skrýtnari en skáldskapur. Nú spyrjum við, hver er réttur uppkomins barnsins? Hvað um skaðann sem hún varð fyrir í kjölfarið af því sem fór fram á upptökunni? Er raunverulega hægt að segja að réttlætið hafi náð fram að ganga?“