England hafði betur gegn Brasilíu í baráttu meistaranna

Þetta er í fyrsta sinn sem þessi leikur fer fram en England varð Evrópumeistari á síðasta ári og Brasilía vann sigur í Copa America og þannig tryggðu liðin sér sæti í þessum úrslitaleik meistara Evrópu og Suður-Ameríku.

England komst yfir þegar Ella Toone skoraði á 22. mínútu en fram að því hafði England verið sterkari aðilinn. Staðan í hálfleik var 1-0 en Brasilía náði ekki að ógna marki Englendinga að ráði í fyrri hálfleiknum.

Brasilía hóf hins vegar síðari hálfleikinn af miklum krafti. Þær breyttu um leikkerfi sem kom Englendingum í opna skjöldu. Mary Earps var þó betri en engin í marki Englands og varði til að mynda úr dauðafæri frá Geyse.

England virtist ætla að sigla sigrinum í höfn en þegar komið var í uppbótartíma tókst Brasilíu að jafna eftir skelfileg mistök Earps. Hún missti þá fyrirgjöf Brasilíu frá sér og Andressa var fljót að átta sig og potaði boltanum inn úr markteignum.

Staðan var 1-1 að loknum venjulegum leiktíma og haldið beint í vítaspyrnukeppni.

Markverðirnir, Mary Earps og Leticia Izidoro voru mjög nálægt því að verja fyrstu spyrnurnar sem láku þó inn. Þeim tókst hins vegar að verja frá Ella Toone og Adriana og staðan 1-1 í vítaspyrnukeppninni eftir fyrstu tvær umferðirnar.

Rachel Daly skoraði fyrir England í þriðju umferðinni en Rafaelle leikmaður Brasilíu þrumaði í þverslána. Alex Greenwood skoraði örugglega úr fjórðu spyrnu Englands og kom liðinu í 3-1 og Kerolin gerði sitt til að halda vonum Brasilíu á lofti með því að skora úr næstu spyrnu Brasilíu.

Það var hins vegar Chloe Kelly sem tryggði Englandi sigur með því að skora örugglega úr síðustu spyrnu Englands. Englendingar fögnuðu fyrir framan fullsetinn Wembley leikvanginn en rúmlega 83.000 áhorfendur voru á leiknum sem er fimmti besti sótti kvennaleikurinn í sögunni en fjórir þessara leikja hafa verið spilaðir á síðustu þrettán mánuðum.