Reiknað með 10 þúsund ferðamönnum á dag á Þingvöllum í sumar

Magnús Hlynur Hreiðarsson skrifar 25. mars 2023 20:05

Einar Á.E. Sæmundsen, þjóðgarðsvörður á Þingvöllum, sem á von á met fjölda erlendra ferðamanna á Þingvelli í sumar. Magnús Hlynur Hreiðarsson

Þjóðgarðsvörðurinn á Þingvöllum segist hlakka til sumarsins því þar er reiknað með met fjölda ferðamanna. Það kæmi þjóðgarðsverði ekki á óvart að allt upp í tíu þúsund manns muni ganga í Almannagjá á hverjum degi í ljósi þess hvað reiknað er með mörgum skemmtiferðaskipum til landsins.

Á Þingvöllum eins og á öðrum ferðamannastöðum landsins er verið að undirbúa sumarið með ráðningu starfsfólks og tryggja að allir innviðir séu klárir. Óvenjulega mikið hefur verið um ferðamenn á Þingvöllum í vetur, ekki síst í febrúar eins og þessi mynd sýnir einn daginn. Einar Á.E. Sæmundsen, þjóðgarðsvörðurvar meðal annars einn af frummælendum nýlega í Tryggvaskála á Selfossi þar sem fólk úr ferðaþjónustu kom saman til að fara yfir stöðu greinarinnar.

„Það varð einhver sprengja þarna í febrúar og ég skynjaði það í gegnum líka ferðaþjónustuaðila í uppsveitunum að þeir voru vel bókaðir. Það er ágætt oft að heyra í þeim því við sjáum ekki bókanir á Þingvöllum, þá er gott að tala við þá til að heyra hvernig bókunarstaðan er og hvað er fram undan. Svo er núna býsna mikil umferð enn þá og sumarið verður ansi líflegt, við erum að undirbúa mikið sumar,“ segir Einar.

Mjög mikið af ferðamönnum heimsóttu Þingvelli í febrúar síðastliðinn eins og þessi mynd ber með sér einn daginn.Aðsend

Já, í sumar verður met fjöldi skemmtiferðaskipa á ferðinni, ekki síst í gegnum Faxaflóahafnir en þar er reiknað með um 270 skipum með 276 þúsund ferðamönnum, sem fara langflestir á Þingvelli.

„Við eigum von á 40 prósent aukningu skipa, sem mun hafa bein áhrif á fjölda ferðamanna, sem koma til okkar og þetta er svolítil holskefla, sem kemur þegar skipin mæta,“ segir Einar og bætir við.

„Í sumar getum við búist við því að það verði á hverjum degi gangandi um Almannagjá þrjú fjögur og upp í tíu þúsund manns kannski á hverjum degi, átta til níu þúsund manns og það er ansi mikið af fólki.“

Kvíðir þú sumrinu?

„Alls ekki, ég bara hlakka til, það verður þröng á þingi en það verður fjör.“

Í sumar verður met fjöldi skemmtiferðaskipa á ferðinni, ekki síst í gegnum Faxaflóahafnir en þar er reiknað með um 270 skipum með 276 þúsund ferðamönnum, sem fara langflestir á Þingvelli.Magnús Hlynur Hreiðarsson

Bláskógabyggð Þingvellir Ferðalög Skemmtiferðaskip á Íslandi Ferðamennska á Íslandi

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir