Bréfið fæst ekki heldur af­hent frá Evrópu

Þetta kemur fram í svari við fyrirspurn fréttastofu til framkvæmdastjórnar Evrópusambandsins, þar sem óskað var eftir afriti af umræddu bréfi. Íslenska forsætisráðuneytið hafði áður synjað beiðni fréttastofu um afrit af svarbréfinu.

Skrifuðust á í sumar

Bréfasendingarnar á milli Katrínar og Von der Leyen áttu sér stað síðastliðið sumar. Tengjast þær áhyggjum íslenskra yfirvalda af áhrifum hinnar svokölluðu Fit for 55 áætlunar Evrópusambansins á flugsamgöngur til og frá Íslandi.

Í erindi sínu til von fer Leyen sagði Katrín að um sé að ræða afar íþyngjandi breytingar fyrir Ísland, sem muni draga úr samkeppnishæfni flugfélaga á Íslandi og Keflavíkurflugvallar.

Málið sé sérstaklega alvarlegt í ljósi þess að tillögurnar muni leiða til verðhækkana í flugsamgöngum, sem séu eini samskiptamátin sem Íslendingum stendur til boða þegar kemur að ferðalögum út fyrir landsteinana.

Lagði Katrín til ýmsar leiðir sem gætu hentað hagsmunum Íslands og óskaði í leiðinni eftir stuðningi von der Leyen við málflutning Íslands.

Fyrir liggur að von der Leyen ritaði svarbréf við erindi Katrínar. Svarbréfið fæst hins vegar sem fyrr segir ekki afhent, hvorki frá íslenskum yfirvöldum né framkvæmdastjórn Evrópusambandsins.

Í desember var komist að bráðabirgða samkomulagi á vettvangi ESB um endurskoðun losunarheimilda (EU ETS) fyrir flugiðnaðinn, sem hluta af Fit for 55 áætlun ESB.

Samkomulagið er sagt tryggja að flugiðnaðurinn leggi sitt af mörkum til þess að stuðla að því að markmiðum Parísarsáttmálans verði náð. Það felur í sér ákveðnar undanþágur fyrir flugrekstur á jaðarsvæðum en engin ríki eða svæði eru nefnd sérstaklega í því samhengi.

Málið enn í ferli

Samkvæmt upplýsingum frá framkvæmdastjórninni er ekki búið að samþykkja umrætt samkomulag á formlegum vettvangi ESB og hefur það því ekki tekið gildi. Gerist það ekki fyrr en að formlegt samþykki Leiðtogaráðs Evrópusambandsins og Evrópuþingins liggur fyrir.

Að því loknu þarf að aðlaga löggjöfina að EES-samningnum og þar koma EFTA-ríkin þrjú, Ísland, Liechtenstein og Noregur inn í myndina.

Í frétt mbl.is á dögunum þar sem farið var yfir málið kemur fram að enn sé von um ásættanlega niðurstöðu fyrir Ísland í málinu. Það sé byggt á því að enn sé ekki búið að samþykkja málið formlega á vettvangi ESB auk samningaviðræðna um hvernig löggjöfin verði tekin upp hér á landi. Þar kom einnig fram að það sjónarmið hafi komið fram innan stjórnkerfisins hér að hreinlega hafna umræddri löggjöf. Líklegra sé þó að einhvers konar aðlögun verði ofan á.