Innlent

Forsetinn í varðskipi á leið til móts við vélarvana togara

Samúel Karl Ólason skrifar
Guðni Th. Jóhannesson, forseti Íslands.
Guðni Th. Jóhannesson, forseti Íslands. Vísir/Vilhelm

Guðni Th. Jóhannesson, forseti Íslands, er um borð í varðskipinu Freyju, sem verið er að sigla til hjálpar vélarvana togara. Tilkynning barst frá togaranum Hrafni Sveinbjarnarsyni um klukkan fjögur í nótt um að togarinn væri aflvana.

Uppfært 14:30 - Freyja er lögð af stað með togarann áleiðis til hafnar. Línu var komið fyrir á milli skipanna og gert ráð fyrir að þau verði komin inn á Ísafjarðardjúp í kvöld en verða ekki komin til hafnar fyrr en í fyrramálið.

Togarinn var um fimmtíu sjómílur norðnorðvestur af Straumnesi þegar aðstoðarkallði barst.

Áhöfn varðskipsins Freyju er á leið á vettvang en verið var að sigla skipinu inn á Patreksfjarðarflóa þar sem skipið átti að vera hluti af minningarathöfn vegna snjóflóðsins sem féll á Patreksfjörð fyrir fjörutíu árum.

Varðskipið á að ná til togarans um klukkan ellefu. Í tilkynningu frá Landhelgisgæslunni segir að reynt verði að aðstoða áhöfn Hrafns við að koma vélum í lag en heppnist það ekki stendur til að draga skipið til hafnar á Ísafirði.

Veður er ágætt á svæðinu en á að versna þegar líður á daginn.

Í tilkynningunni segir að Guðni hafi verið sóttur til Grundarfjarðar í gærkvöldi þar sem tvísýnt var um landleiðina til Patreksfjarðar í dag. Þegar útkallið barst var forsetinn vakinn af værum svefni, eins og það er orðað í tilkynningunni, og spurður hvort að reyna ætti að setja hann í land.

Guðni vildi ekki að björgunaraðgerðir tefðust og fer hann því með skipinu til móts við Hrafn Sveinbjarnarson.

Haft er eftir skipstjóra Freyju að Guðni sé orðinn sjóaður og fylgist vel með gangi mála.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.