Fótbolti

„Ég mun greiða sektina sjálfur“

Valur Páll Eiríksson skrifar
Mbappé hefur gengið vel á HM.
Mbappé hefur gengið vel á HM. Visionhaus/Getty Images

Frakkinn Kylian Mbappé hefur farið mikinn á HM í Katar þar sem lið hans á titil að verja. Hann gaf í fyrsta skipti á mótinu kost á viðtali eftir sigur Frakka á Póllandi í gær.

Mbappé skoraði tvö marka Frakka í 3-1 sigri á Póllandi sem veitti þeim frönsku sæti í 8-liða úrslitum keppninnar þar sem fer fram grannaslagur við England. Alls hefur Mbappé skorað fimm mörk í keppninni og er markahæstur, tveimur mörkum á undan næstu mönnum.

Hann hefur ekki veitt eitt einasta viðtal á meðan mótinu hefur staðið en breytti því í gær.

„Ég veit það hafa verið spurningar verið spurðar um það hvers vegna ég lét ekki í mér heyra. Þetta er ekkert persónulegt gegn fjölmiðlamönnum eða Frökkum. Ég þurfti einfaldlega að einbeita mér að leiknum og gera það 100 prósent án þess að eyða orku í annað,“

„Mér skilst að franska fótboltasambandið verði sektað vegna þess. Ég mun greiða sektina sjálfur, þeir eiga ekki að greiða fyrir persónulegt val mitt,“ segir Mbappé.

England vann 3-0 sigur á Senegal í gær og er næsti andstæðingur Frakka á mótinu. Liðin keppa um sæti í undanúrslitum næsta laugardag.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.