Innlent

Tuttugu og tvær nauðganir tilkynntar á mánuði

Fanndís Birna Logadóttir skrifar
Sé litið til tíma brots voru að jafnaði sextán nauðganir á mánuði á fyrstu níu mánuðum ársins. 
Sé litið til tíma brots voru að jafnaði sextán nauðganir á mánuði á fyrstu níu mánuðum ársins.  Vísir/Vilhelm

Alls barst lögreglu 195 tilkynningar um nauðganir á fyrstu níu mánuðum ársins og var því að jafnaði tilkynnt um 22 nauðganir á mánuði. Um er að ræða 26 prósent aukningu frá því í fyrra. Blygðunarsemisbrotum og kynferðisbrotum gagnvart börnum fækkar á sama tíma. 

Um er að ræða fjölda tilkynntra brota en þegar horft er til tímasetningar, það er hvenær brotin áttu sér stað, áttu 146 nauðganir sér stað á fyrstu níu mánuðum ársins, sem er aukning um sextán prósent milli ára. Getur það þó tekið breytingum í framtíðinni þar sem slík brot eru oft tilkynnt seinna.

Að því er kemur fram í nýrri skýrslu ríkislögreglustjóra sem birtist í dag voru allt í allt 490 tilkynningar um kynferðisbrot á tímabilinu sem er tæplega tveggja prósentustiga fækkun milli ára. Þegar horft er til tíma brots voru brotin 348 talsins.

Þó tilkynningum um nauðganir hafi fjölgað hefur tilkynntum kynferðisbrotum fækkað lítillega. 

Flestar tilkynningar um kynferðisbrot voru í september, alls 72. Þar af voru 30 tilkynningar um nauðgun.

Blygðunarsemisbrotum og kynferðisbrotum gagnvart börnum fækkar, tilkynnt blygðunarsemisbrot voru 48 og kynferðisbrot gegn börnum 76, en brotum vegna kynferðislegrar áreitni og brotum gegn kynferðislegri friðhelgi fjölgar.

Grunaðir voru í 95 prósent tilfella karlmenn þegar kom að kynferðisbrotum almennt, af 329 grunuðum voru 200 grunaðir um nauðgun á tímabilinu. Meðalaldur grunaðra í kynferðisbrotamálum var 34 ár en í tíu prósent tilfella voru grunaðir undir átján ára aldri, svipað og fyrri ár.

Vilja fjölga tilkynningum

Ríkislögreglustjóri birti sömuleiðis skýrslu í gær um heimilisofbeldi þar sem fram kom að tilkynningar um heimilisofbeldi og ágreining milli skyldra eða tengdra aðila hafi aldrei verið fleiri.

Verkefnastjóri aðgerða gegn ofbeldi hjá ríkislögreglustjóra hefur þó ítrekað að fleiri tilkynningar séu ekki endilega merki um meira ofbeldi en það hafi verið skýrt markmið hjá stjórnvöldum að fjölga tilkynningum samhliða því markmiði að fækka ofbeldisbrotum.

Átak ríkislögreglustjóra og fleiri aðila er stór hluti í þeirri þróun þar sem vitundarvakning gegn ofbeldi hefur verið áberandi á árinu, líkt og var til að mynda fyrir verslunarmannahelgi.

Vitundarvakningunni verður framhaldið í aðdraganda hátíðanna með áherslu á að vinna gegn ofbeldi og áreitni en almenningur er hvattur til að skemmta sé vel þar sem góð skemmtun feli í sér að allir geti verið öruggir fyrir kynferðislegu ofbeldi og áreitni. Þá er fólk hvatt til að leita til neyðarlínunnar ef áhyggjur vakna.

Á heimasíðunni 112.is er sömuleiðis hægt að finna leiðarvísi um réttargæslukerfið fyrir þolendur kynferðisbrota, þar á meðal svör við spurningum hvernig er hægt að tilkynna kynferðisbrot, hvert er hægt að leita til að fá aðstoð, hvað gerist þegar kynferðisbrot er kært og góð ráð frá þolendum sem hafa verið með mál í réttarvörslukerfinu, fagaðilum og starfsfólki lögreglu og héraðssaksóknara.


Tengdar fréttir

Fleiri skili skömminni og til­kynni of­beldis­brot en áður

Þrátt fyrir að skráðum brotum um ofbeldi meðal barna og ungmenna hafi fjölgað þýðir það ekki endilega aukningu slíkra brota að sögn sviðsstjóra hjá Ríkislögreglustjóra. Hún telur að hærra hlutfall slíkra mála sé að skila sér inn í kerfið og fólk tilkynni frekar slík brot en áður. Opin umræða og hvatning um að skila skömminni sé að skila sér.

Fleiri til­kynningar ekki endi­lega merki um meira of­beldi

Verkefnastjóri aðgerða gegn ofbeldi hjá ríkislögreglustjóra segir það hafa verið skýrt markmið hjá stjórnvöldum að ekki einungis fækka ofbeldisbrotum heldur einnig að fjölga tilkynningum. Það endurspeglist í mikilli aukningu tilkynninga um heimilis- og kynferðisofbeldi.

Ekkert pláss fyrir of­beldi þegar stærsta ferða­helgi ársins fer fram

Það styttist í eina stærstu ferðahelgi ársins eftir rúm tvö ár af kórónuveirufaraldri. Eyjamenn eru byrjaðir að undirbúa sig en verða þó án forvarnarhópsins Bleika fílsins í ár. Þess í stað verður þjóðhátíð hluti af átaki lögreglu og Neyðarlínunnar, og er sömu sögu að segja víðar á landinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.