Brasilíski hópurinn fyrir HM klár: Enginn Firmino á meðan Antony fagnaði gríðar­lega

Hópurinn í heild sinni er nokkuð líkur því sem búist var við. Athygli vekur að í 26 manna hóp eru aðeins sex miðjumenn en níu leikmenn sem titlaðir eru sem framherjar. Manchester United er það lið sem á flesta leikmenn í hópnum.

Alex Telles, sem er á láni hjá Sevilla, er í hópnum ásamt Casemiro, Fred og vængmanninum Antony. Sá síðastnefndi hefur birt fallegt myndband á samfélagsmiðlum sínum þar sem hann sést fagna sætinu ásamt fjölskyldu sinni og hundi.

Hópinn í heild sinni má sjá hér að neðan. Alls eru 13 leikmenn í eigu félaga á Englandi á meðan þrír spila enn í heimalandinu. Roberto Firmino hefur skorað átta mörk til þessa fyrir Liverpool á leiktíðinni en ekkert pláss er fyrir hann í hópnum. 

Brasilía er sem stendur á toppi heimslista FIFA og er til alls líklegt í Katar. Brasilía er í G-riðli ásamt Serbíu, Sviss og Kamerún.