Boðnar mörg hundruð þúsund krónur fyrir lengsta skegg á Íslandi

Í fréttum Stöðvar 2 hittum við hjónin Guðmund Júlíus Þórðarson og Hrefnu Sóleyju Kjartansdóttur en þau búa á Arabæjarhjáleigu í Flóa. Fullyrt er að Guðmundur hafi lengsta skegg á Íslandi.

„Hann vefur þessu um hálsinn og fær svo svima,“ segir eiginkonan Hrefna Sóley og virðist ekki hrifin af þessu langa skeggi bóndans.

„Æ, mér leiðist það,“ segir hún og hlær.

„Mér finnst það bara ljótt,“ útskýrir hún og allir skella upp úr.

Þessu ráði hann þó alveg sjálfur.

„Eitt af því fáa sem maður ræður sjálfur,“ segir Guðmundur glettinn.

Hann segist hafa safnað skegginu í 22 ár en þessi fyrrum húsasmiður starfaði lengi sem gæslumaður á Sogni í Ölfusi.

Og þegar hann dregur skeggið upp úr skyrtunni verðum við rasandi hissa. Og enn meira þegar við sjáum að hann er búinn að vefja því í vöndul um hálsinn.

-Hvað nær það langt niður?

„Alveg niður á jörð, held ég.“

-Ertu búinn að mæla lengdina á því?

„Nei, nú þyrfti að mæla það.“

Við drögum fram málbandið. Meðan Guðmundur heldur í annan endann reynum við að strekkja sem mest á skegginu, þó án þess að meiða hann, til að fá sem nákvæmasta mælingu. Niðurstaðan er að skeggið sé að minnsta kosti 180 sentímetrar á lengd, kannski örlítið lengra en það.

Hann segist þó ekkert vera farinn að spá í að raka það af.

-Þú býður það ekki bara hæstbjóðanda að kaupa það af þér?

„Ja, það er nú eiginlega boðið í það, jú.“

-Ertu búinn að fá boð?

„Já.“

-Og hvað er það hátt?

„330 þúsund. Og hann hækkar það ef einhver býður betur. Þá verður hækkað,“ segir Guðmundur Júlíus.

„Ókei, ég býð 350 þúsund,“ segir þá Telma Tómasson fréttaþulur.

Hér má sjá frétt Stöðvar 2: