Innlent

Hægt sé að koma böndum á verðbólguna en allir þurfi að vera samstíga

Fanndís Birna Logadóttir skrifar
Guðrún Hafsteinsdóttir, formaður efnahags- og viðskiptanefndar Alþingis.
Guðrún Hafsteinsdóttir, formaður efnahags- og viðskiptanefndar Alþingis. Vísir/Vilhelm Gunnarsson

Formaður efnahags- og viðskiptanefndar Alþingis segir það áhyggjuefni að búast megi við mikilli verðbólgu fram á næsta ár. Mikilvægt sé að vernda veikasta hópinn án þess þó að skapa íþyngjandi umhverfi fyrir fyrirtæki í landinu með skattahækkunum. Ljóst sé að allir aðilar þurfi að vera samstíga fyrir erfiðar kjaraviðræður í haust.

Verðbólga nálgast nú tveggja stafa tölu og er því spáð að hún hækki enn frekar í næsta mánuði. Guðrún Hafsteinsdóttir, formaður efnahags- og viðskiptanefndar Alþingis, segir það lengi hafa verið viðbúið að verðbólga myndi ná hámarki seinni hluta sumars en færi síðan niður á við.

„Nú er allt útlit fyrir að verðbólgan muni lækka eða svona stöðvast hægar en allir gerðu ráð fyrir eða voru að vonast eftir. Þannig það er hætt við því að við verðum með nokkuð mikla verðbólgu vel fram á næsta ár og það er mikið áhyggjuefni.

Kjaraviðræður eru fram undan í haust og ljóst að nokkuð langt verði milli aðila. Það hljóti þó að vera markmið allra sem að samningsborðinu koma að ná verðbólgunni niður, og mögulega þurfi stjórnvöld að stíga inn í, líkt og þau hafi áður gert.

„Í þessu ástandi þá náttúrulega hlýtur það að liggja í hlutarins eðli að við viljum auðvitað standa vörð um, og vera með þá aðgerðir sem beinast að þeim sem að höllustum fæti standa í okkar samfélagi. Ég sé það helst fyrir mér að stjórnvöld komi að borðinu hvað þann hóp varðar,“ segir hún.

Hægt sé að koma böndum á verðbólguna

Drífa Snædal, forseti Alþýðusambandsins, sagði í kvöldfréttum Stöðvar 2 í gær að stjórnvöld gætu til að mynda breytt skattkerfinu með það fyrir sjónum að sækja skatttekjur hjá þeim sem væru aflögufærir. Guðrún segist sjálf þeirrar skoðunar að lækka eigi skatta frekar en að lækka þá.

„Við megum heldur ekki íþyngja fyrirtækjum um of, þannig þau geti þrifist vel og það skili sér frekar í kassa ríkisins heldur en hitt. Við megum ekki vera með það íþyngjandi rekstrarumhverfi hér að fyrirtækin okkar sjái sér ekki í hag að starfa á Íslandi eða vera hér,“ segir hún.

Ýmsar aðrar aðgerðir standi til boða, til að mynda á húsnæðismarkaði. Hægt sé að ná böndum á verðbólguna og ná saman í kjaraviðræðum, en til þess þurfi allir að taka höndum saman.

„Ég held að við verðum að horfast í augu við það að við erum að koma út úr heimsfaraldri, það er verið að koma af stað ferðaþjónustu og atvinnugreinum aftur í gang sem að hafa verið í mjög alvarlegri stöðu um tveggja ára skeið,“ segir Guðrún.

„Þannig að til þess að vel takist til þá verðum við að taka höndum saman og ganga nokkuð samstillt í sömu áttina,“ segir hún enn fremur.


Tengdar fréttir

Kaupmáttur á niðurleið vegna mikillar verðbólgu

Kaupmáttur heldur áfram að minnka með aukinni verðbólgu og er nú svipaður og hann var í desember 2020. Hagsjá Landsbankans spáir áframhaldandi kaupmáttarrýrnun. Á síðustu tólf mánuðum hafa laun á veitinga- og gististöðum hækkað meira en í öðrum atvinnugreinum.

Spá því að verð­bólga aukist á­fram og stýri­vextir verði hækkaðir

Verðbólgan mældist tæplega tíu prósent í júlí og var langt umfram spár viðskiptabankanna. Forstöðumaður hagfræðideildar Landsbankans segir að gera megi ráð fyrir frekari stýrivaxtahækkunum frá Seðlabankanum í ljósi stöðunnar. Hagfræðiprófessor segir að það taki tíma fyrir aðgerðir stjórnvalda til að bíta, með tilheyrandi aðhaldi og óvissu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×