Segja að Galatasaray hafi boðið Gylfa 280 milljónir í laun á ári

Tyrkneskur miðill sló því upp að íslenski miðjumaðurinn hafi fengið tveggja ára samningstilboð frá liðinu.

Samkvæmt AS Marca í Tyrklandi þá á Gylfi meira að segja að hafa samþykkt þennan samning sem á að skila honum tveimur milljónum evra í árslaun eða tæplega 280 milljónir króna.

Gylfi hefur ekki spilað fótbolta í meira en ár, hvorki fyrir félagslið eða landsliðs og samningur hans við Everton rann út á dögunum. Gylfi var handtekinn í fyrrasumar þar sem hann var grunaður um kynferðisbrot gegn ólögráða einstaklingi. Rannsókn málsins er enn í gangi og Gylfi er því enn í farbanni.

Gylfi var dýrasti leikmaðurinn í sögu Everton þegar félagið keypti hann á 40 milljónir punda árið 2017. Hann skoraði 31 mark í 156 leikjum fyrir félagið.