Brá þegar hann opnaði úti­dyrnar í morgun

Mikið hvass­viðri í Eyjum í nótt gerði það að verkum að mikill skaf­renningur skapaðist.

Snjórinn hrúgaðist því upp í kring um hús og bíla og olli mörgum Eyja­mönnum vand­ræðum.

Þannig var þetta til dæmis staðan þegar einn þeirra ætlaði að kíkja út um úti­dyrahurðina í morgun: 

„Ég fór hérna upp á stól. Mokaði svona gat og skreið út þegar ég var búinn að ná svona fyrir bumbuna líka,“ segir Eyja­maðurinn Tryggvi Sigurðs­son.

Hann fékk síðan vin sinn sem á gröfu til að að­stoða sig að ryðja heim­reiðina en gröfur og snjó­ruðnings­tæki hafa verið að störfum í Eyjum síðan snemma í morgun.

Hafa gaman að veðrinu

Katrín Lauf­ey Rúnars­dóttir, einn rit­stjóri bæjar­miðilsins Tíguls, var mætt snemma út í morgun til að kanna stöðuna.

Hún segir að flestir hafi haft gaman að fann­ferginu, sér­stak­lega eig­endur vel út­búinna jeppa.

„Eins og maður sá hérna á vegum að það höfðu verið virki­legar tor­færur fyrir jeppana að fara og mjög gaman. Ég hitti ein­mitt einn sem var á ferð í alla nótt á risa­bíl. Og hann brosti breytt og þótti þetta mjög gaman,“ segir Katrín.

Flestir hafi þó verið illa búnir undir á­standið.

„En sem betur fer voru engin stór­vægi­leg tjón eða neitt þess háttar. Bara fastir bílar út um allt, illa búnir bílar og svona af því að Vest­mann­eyingar þekkja þetta kannski ekki alveg. En sem betur fer fór allt vel,“ segir Katrín.

Sá það verra 1968 og 2008

Nei, Eyja­menn eru ekki vanir miklum snjó en Tryggvi hefur þó séð það verra en í morgun.

„Já, já, ég hef nú gert það og meira en þetta. Ég upp­lifði hérna mikla snjóinn 1968 sko og líka hérna 2008 eða eitt­hvað svo­leiðis þá var allt á kafi hérna. En það hefur ekkert verið svona í um 15 ár,“ segir hann.