Tottenham tókst ekki að nýta liðsmuninn

Sindri Sverrisson skrifar
Harry Kane jafnaði metin fyrir Tottenham úr víti og skoraði annað mark en það var dæmt af eftir myndbandsskoðun, vegna mjög tæprar rangstöðu.
Harry Kane jafnaði metin fyrir Tottenham úr víti og skoraði annað mark en það var dæmt af eftir myndbandsskoðun, vegna mjög tæprar rangstöðu. AP/Andrew Matthews

Tottenham er enn taplaust undir stjórn Antonio Conte í ensku úrvalsdeildinni í fótbolta en varð að láta sér nægja 1-1 jafntefli gegn Southampton í dag þrátt fyrir að hafa ellefu menn gegn tíu allan seinni hálfleik.

James Ward-Prowse kom Southampton yfir á 25. mínútu og heimamenn virtust í góðum málum þar til á 41. mínútu þegar Son Heung-Min fékk stungusendingu í gegnum vörn þeirra.

 Mohamed Salisu braut á Son innan teigs og fékk sitt annað gula spjald og þar með rautt. Harry Kane skoraði svo úr vítinu af miklu öryggi, í þriðja deildarleiknum í röð.

Kane virtist svo hafa komið Tottenham yfir snemma í seinni hálfleik en hann var dæmdur afar naumlega rangstæður eftir myndbandsskoðun.

Fleiri mörk voru ekki skoruð og Tottenham missti því West Ham upp fyrir sig og er nú í 6. sæti með 30 stig, en með tvo leiki til góða á liðin fyrir ofan sig. Southampton er með 21 stig í 13. sæti.

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.