Í dag eru 5.126 einstaklingar í eftirliti hjá Covid-19 göngudeild Landspítalands og fjölgar þeim um 791 á milli daga. 21 liggur inni á Landspítalanum vegna Covid-19.
Meðalaldur þeirra sem eru inniliggjandi á Landspítalanum er 63 ár. Innlögnum á spítalann vegna Covid-19 fjölgaði um sjö á milli daga en fjórtán voru inniliggjandi í gær. Fjórir eru á gjörgæslu og þar af þrír í öndunarvél.
Aldrei hafa verið fleiri skráðir í eftirliti hjá göndudeild Landspítalans og eru þeir sem fyrr segir 5.126, þar af 1.142 börn. Í gær voru 4.335 undir eftirliti deildarinnar.
Smitrakningarteymið sér fram á að geta ekki lengur hringt í alla sem greinast með veiruna, eins og hingað til hefur alltaf verið gert. Rúmur fjórðungur þeirra sem fóru í sýnatöku við Covid-19 í gær greindust með veiruna, samtals 664. Hlutfallið hefur aldrei verið eins hátt.
Sjúklingur á hjartadeild Landspítala greindist smitaður af kórónuveirunni í gær. Í kjölfar skimunar allra inniliggjandi sjúklinga hafa sex greinst til viðbótar.
