Erlent

Útsendarar Kína í innsta hring herafla Taívans og meðal lífvarða forsetans

Samúel Karl Ólason skrifar
Frá þjóðhátíðardegi Taívans í haust.
Frá þjóðhátíðardegi Taívans í haust. EPA/RITCHIE B. TONGO

Kínverskir njósnarar hafa orðið sér út um útsendara í innsta hring lífvarða forseta Taívans og meðal forsvarsmanna herafla eyríkisins. Gagnnjósnarar Taívans eiga í erfiðri baráttu gegn umfangsmikilli njósnaherferð Kínverja sem ætlað er að veita upplýsingar um varnir eyjunnar og grafa undan leiðtogum hennar.

Undanfarin ár hafa fjölmargir útsendarar Kína í Taívan verið dæmdir fyrir njósnir. Þeir hafa fundist innan herafla ríkisins, stofnana og víða annars staðar.

Reuters fréttaveitan segir minnst 21 fyrrverandi og starfandi foringja í her Taívans með stöðu kafteins eða hærri hafa verið dæmda fyrir njósnir á undanförnum áratug. Nú sé verið að rétta yfir eða rannsaka níu til viðbótar.

Einn þeirra sem er til rannsóknar er fyrrverandi aðstoðarvarnarmálaráðherra Taívans. Hann er herforingi og heitir Chang Che-ping. Reuters segir hann hafa átt í samskiptum við kínverskan mann sem hefur verið eftirlýstur í Taívan vegna njósna.

Fólkið hefur verið dæmt fyrir að reyna að fá aðra til að njósna fyrir Kínverja og fyrir það að útvega Kínverjum upplýsingar. Þar á meðal eru upplýsingar um herforingja og útsendara Taívans í Kína.

Talsmenn varnarmálaráðuneytis Taívans staðhæfðu við Reuters að engu hefði verið lekið til Kínverja úr hernum. Í tilkynningu sagði að starfsmenn hersins væru menntaðir í því að bregðast við njósnum og verðlaunaðir fyrir að tilkynna mögulega njósnara. Vegna þessara aðgerða hefði ekkert lekið úr hernum.

Frá öðrum stofnunum í Taívan bárust hins vegar önnur svör sem vísa til þess að ráðamenn hafi áhyggjur af njósnunum.

Xi Jinping, forseti Kína, hefur sagt að til greina komi að beita valdi til að sameina Taívan meginlandinu.EPA/Ju Peng

Heita því að sameina Taívan meginlandinu

Kínverjar segja Taívan tilheyra Kína en árið 1949 flúðu þjóðernissinna til eyjunnar undan kommúnistum í borgarastyrjöld landsins. Forsvarsmenn Kommúnistaflokksins hafa heitið því að ná völdum í Taívan, með valdi ef nauðsynlegt sé.

Xi Jinping, forseti Kína, hefur sagt það „óhjákvæmilegt“ að Taívan verði hluti af Kína.

Sjá einnig: Heitir því að Taívan verði sameinað Kína á ný

Taívanar segjast sjálfstæðir og segjast ætla að verja frelsi þeirra og lýðræði. Sjálfstæðissinnum hefur vaxið ásmegin í Taívan á undanförnum árum en Taívanar hafa aldrei lýst yfir formlegu sjálfstæði.

Meiri vilji, minni geta

Taívan hefur staðið frammi fyrir mögulegri innrás frá Kína í áratugi. Undanfarin ár hafa þó orðið mikilvægar breytingar sitthvoru megin við Taívansund.

Samhliða því að sjálfstæðissinnum hefur vaxið ásmegin í Taívan, hefur geta herafla ríkisins dregist saman. Um þrjár milljónir manna eru í varalið herafla Taívans en meirihluti þeirra segist litla sem enga þjálfun hafa fengið.

Sérfræðingar sem Reuters ræddi við segja að vel staðsettir útsendarar gætu reynst Kína öflugt tól ákveði forsvarsmenn Kommúnistaflokksins að gera innrás. Þeir gætu til að mynda veitt upplýsingar um staðsetningar loftvarna á varnaráætlanir um flutning hermanna.

Þó Taívanar séu mun færri en Kínverjar hafa þeir haft áratugi til að undirbúa varnir eyjunnar og Kínverjar þyrftu að flytja hermenn, skriðdreka og önnur tól minnst 130 kílómetra yfir sundið milli Kína og Taívans.


Tengdar fréttir

Erindrekar Litháens kallaðir heim frá Kína vegna „ógnana“

Ríkisstjórn Litháens hefur kallað erindreka sína og sendiráðsstarfsmenn í Kína heim og segir að sendiráðið í Kína verði starfrækt með fjarvinnu um óákveðinn tíma. Samband ríkjanna hefur beðið mikla hnekki eftir að Taívan opnaði ræðismannsskrifstofu í Litháen.

Reiðir yfir því að fá ekki boð á lýðræðisfund Bidens

Joe Biden mun í dag loka tveggja daga stafrænum lýðræðisfundi sínum með því að beina athygli að mikilvægi þess að standa í hárinu á harðræðisstjórnum og einræðisherrum og það að tryggja sjálfstæða fjölmiðla.

Xi festir sig í sessi og setur sig á stall með Mao og Deng

Leiðtogar Kommúnistaflokks Kína hafa samþykkt sögulega ályktun um flokkinn sem festir Xi í sessi sem einn af áhrifamestu leiðtogum Kína. Með þessu er Xi líklegur til að tryggja sér þriðja kjörtímabilið sem forseti Kína á næsta ári en það hefur enginn gert áður.

ESB til Taívana: „Þið eruð ekki ein“

Fyrsta opinbera sendinefnd Evrópuþingsins til Taívan tilkynnti ráðamönnum þar að íbúar eyríkisins stæðu ekki einir gegn sífellt auknum þrýstingi frá Kína. Taívanar leita bandamanna um víða veröld.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×