Innlent

Elliðaárstöð stendur ónotuð á tíma raforkuskorts í landinu

Kristján Már Unnarsson skrifar
Elliðaárstöðin er 100 ára á þessu ári.
Elliðaárstöðin er 100 ára á þessu ári. Egill Aðalsteinsson

Á sama tíma og kvartað er undan raforkuskorti í landinu vekur athygli að heil virkjun skuli standa ónotuð og það innan borgarmarka Reykjavíkur. Þetta er Elliðaárstöðin en forstjóri Orkuveitu Reykjavíkur sagði fyrir ári að engin þörf væri á meiri orku.

Í fréttum Stöðvar 2 var fjallað um Elliðaárstöðina sem varð eitthundrað ára gömul á þessu ári. Inni í stöðvarhúsinu eru ennþá hverflar sem geta framleitt yfir þrjú megavött. 

Stíflurnar standa enn; Árbæjarstíflan með sínu inntaksmannvirki sem og miðlunarstíflan við Elliðavatn. Og vélbúnaðurinn var sagður í góðu lagi þegar upplýsingafulltrúi Orkuveitunnar sýndi okkur stöðina sumarið 2019.

Talsmaður Orkuveitunnar, Eiríkur Hjálmarsson, segir frá virkjuninni í viðtali sumarið 2019.Arnar Halldórsson

„Hún er í raun og veru alveg virk, Elliðaárstöðin. Okkur vantar bara vatnið. Af því að pípan, sem leiðir vatnið frá Árbæjarstíflunni hérna niður að stöðinni, hún er ónýt,“ sagði Eiríkur Hjálmarsson í viðtali í stöðvarhúsinu fyrir rúmum tveimur árum og sagði í skoðun hvort borgaði sig að endurnýja hana.

„Þannig að hugmyndin núna, sem við erum að skoða, er sú að endurnýja pípuna – svolítið mjórri heldur en hún er núna – grafa niður hér við norðvesturhorn hússins eina aflvél og framleiða þá bara með alsjálfvirkum hætti rafmagn hér aftur í Elliðaárstöð,“ sagði Eiríkur í júnímánuði 2019.

Séð yfir Árbæjarstíflu.Egill Aðalsteinsson

En ekkert varð af þessum áformum og raunar lýsti forstjóri Orkuveitunnar, Bjarni Bjarnason, yfir því mati sínu á RÚV í fyrra að meiri líkur væru á offramboði en skorti á rafmagni, sagði að ekki þyrfti að virkja sérstaklega til að rafvæða samgöngur né þyrfti að styrkja flutningskerfi Landsnets sérstaklega. Hann hafði þremur árum fyrr lýst þeirri skoðun í Morgunblaðinu að enginn orkuskortur væri yfirvofandi.

Þegar við leituðum svara frá forstjóra Orkuveitunnar í dag, í gegnum Breka Logason upplýsingafulltrúa, hversvegna Elliðaárstöðin væri ekki endurræst, fékkst það svar frá Eiríki Hjálmarssyni, sem núna er titlaður sérfræðingur í samfélagsábyrgð hjá Orkuveitunni, að niðurstaða hagkvæmniathugunar, sem ráðist var í, hafi verið að rafmagnið frá endurnýjaðri rafstöð hefði þurft að kosta miklu meira en nokkur væri tilbúinn að greiða fyrir það.

Allt vatn Elliðaánna rennur núna framhjá virkjuninni.Egill Aðalsteinsson

Eiríkur sagði ennfremur að verndun lífríkis ánna kallaði á að viðunandi vatnsmagn rynni um farveg Elliðaánna. Því væri eingöngu hægt að reka virkjunina á dagvinnutíma, bara á virkum dögum og bara hálft árið, eins og gert hafi verið frá því um 1970.

Hátt í milljarð króna hefði kostað að gera upp stöðina og útilokað talið að sú fjárfesting skilaði sér nokkurn tíma, segir í svari Eiríks.

En spyrja má hvort þjóðin hafi lengi efni á því að láta stöð sem þessa standa ónotaða. Sérfræðingur sem við ræddum við áætlar að þótt einungis þriðjungur af orkugetu hennar væri nýttur myndi hún samt anna raforkuþörf um 1.700 heimila.

Hér má sjá frétt Stöðvar 2:


Tengdar fréttir

Skerða orku til fiski­mjöls­verk­smiðja, ál­vera og gagna­vera

Landsvirkjun hefur ákveðið að skerðing á afhendingu raforku til fiskimjölsverksmiðja taki strax gildi, en ekki í janúar eins og ætlað hafði verið. Skerðingin nær einnig til stórnotenda á borð við gagnaver og álver sem eru með skerðanlega skammtímasamninga.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.