Langþráður draumur að rætast

Sylvía Rut Sigfúsdóttir skrifar 13. október 2021 09:01

Svanhildur Konráðsdóttir forstjóri Hörpu segir að viðburðurinn verði á heimsmælikvarða. Vísir/Vilhelm

Concertgebouw hljómsveitin, ein allra besta sinfóníuhljómsveit heims, kemur fram í Eldborg í Hörpu þann 10. nóvember næstkomandi. Er þetta í fyrsta sinn sem hljómsveitin kemur til Íslands en stjórnandi á tónleikunum er hinn bráðungi og eftirsótti hljómsveitarstjóri, Klaus Mäkelä.

Um er að ræða viðburð á heimsmælikvarða sem örsjaldan býðst að upplifa á Íslandi. Á efnisskránni eru tvær stórbrotnustu sinfóníum tónbókmenntanna, hin epíska sjötta sinfónía Dímítríj Shostakovitsj og hin tregafulla sjötta sinfónía Pjotr Tsjajkovskíj, með undirtitilinn „Pathétique“. Tónleikarnir eru því tvímælalaust einn af hápunktum ársins í fjölbreyttri dagskrá í tilefni af 10 ára afmæli Hörpu. Miðasala hefst föstudaginn 15.október kl. 12.

Klaus Mäkelä er aðeins 25 ára gamall en er nú þegar einn eftirsóttasti hljómsveitarstjóri heims. Hann hefur starfað sem aðalhljómsveitarstjóri Fílharmóníuhljómsveitarinnar í Ósló frá 2020 og verður auk þess aðalhljómsveitarstjóri Orchestre de Paris frá haustinu 2022. Klaus Mäkelä stjórnar reglulega bestu sinfóníuhljómsveitum heims, þar á meðal Concertgebouw hljómsveitinni.

Draumur sem varð að veruleika

„Það hefur verið draumur beggja aðila að koma á tónleikum með þessari stórkostlegu hljómsveit í Hörpu, enda húsið byggt til að geta tekið á móti bestu listamönnum í heimi. Þessi draumur er nú að rætast á þessu óvenjulega afmælisári hússins. Aðeins verður um eina tónleika að ræða. Þetta einstaka tækifæri í samstarfi Hörpu og hljómsveitarinnar bauðst núna og vart hægt að hugsa sér glæsilegra innlegg í upprisu menningar- og listalífsins á Íslandi,“ segir Svanhildur Konráðsdóttir forstjóri Hörpu.

Concertgebouw hljómsveitin þykir skara fram úr fyrir silkimjúkan hljóm, mikla dýnamíska breidd og gífurlega blæbrigðaríka og næma túlkun. Hljómsveitin var stofnuð árið 1888 og á heimili sitt í hinu einstaka tónlistarhúsi Concertgebouw, í miðborg Amsterdam. Með sveitinni starfa á hverjum tíma færustu listamenn sígildrar tónlistar og hafa til dæmis mörg þekktustu tónskáld sögunnar stjórnað flutningi hljómsveitarinnar á sínum verkum, þar á meðal Richard Strauss, Gustav Mahler og Igor Stravinsky.

Hljómsveitin leikur um 80 tónleika í aðalsal sínum á ári hverju en leggur auk þess áherslu á að heimsækja bestu tónleikasali heims. Það er því einstakt að fá hljómsveitina í fyrsta sinn til Íslands og hlýða á flutning hennar í Eldborg Hörpu.

Tónlist Harpa