Andri Lucas gæti byrjað gegn Þýskalandi en „auðvelt að brenna leikmenn“

„Andri Lucas getur alveg byrjað inn á á morgun. En eins og ég hef sagt oft verðum við að passa upp á þessa drengi,“ sagði Arnar á blaðamannafundi í dag.

Andri Lucas skoraði sitt fyrsta landsliðsmark, strax í öðrum A-landsleiknum, þegar Ísland gerði 2-2 jafntefli við Norður-Makedóníu á sunnudaginn. Þessi 19 ára knattspyrnumaður er einn af mörgum ungum leikmönnum sem eru í íslenska hópnum núna, í fjarveru margra af fastamönnum hópsins síðsutu ár.

„Við þurfum að passa að þessir ungu drengir fái mínúturnar á réttum tíma, undir réttum kringumstæðum. Það er alveg sama hver andstæðingurinn er hjá A-landsliði karla, það eru alltaf góðir leikmenn í hinu liðinu og við þurfum að stýra þessum ungu leikmönnum rétt inn í framtíðina. Það er rosalega auðvelt að „brenna“ leikmenn. Bara henda þeim nógu andskoti oft í djúpu laugina þar til þeir verða þreyttir. Við reynum að taka mjög markvissar ákvarðanir með alla þessa drengi,“ sagði Arnar.

Þjálfarinn benti í þessu sambandi á að ákveðið hefði verið að færa Mikael Egil Ellertsson úr A-landsliðinu í U21-landsliðið sem mætir Grikklandi í dag, og sagði að góð samvinna væri á milli A-landsliðsins og U21- og U19-landsliðanna.

Átján reyndari og sjö ungir væri ákjósanlegast

Spurður nánar út í það hversu mikilvægt það væri fyrir Andra Lucas, Andra Fannar Baldursson, Ísak Bergmann Jóhannesson og fleiri af ungu strákunum að hafa reynslumikla menn sér til stuðnings svaraði Arnar:

„Það er rosalega mikilvægt. Ef við Eiður [Smári Guðjohnsen, aðstoðarlandsliðsþjálfari] mættum velja sjálfir, varðandi svona uppbyggingu, þá værum við að tala um 18 reyndari leikmenn plús sjö yngri leikmenn í hópi hjá A-landsliði karla. Með því jafnvægi gætum við verið að tala um eðlilega uppbyggingu,“ sagði Arnar. Staðan er heldur önnur núna:

„Ég setti niður á blað í morgun að ef ég hefði mátt velja mitt draumalið í verkefnið í mars, þá hefðu verið 7-8 leikmenn mjög nálægt byrjunarliðinu í mars sem ekki eru með núna. Svo er ekkert leyndarmál að Kári er 38 ára, Hannes 37 og Birkir Már 36. Þegar þetta allt er talið þá er þetta jafnvægi ekki í hópnum núna og við gerum okkur alveg grein fyrir því. Það gerir okkur aðeins erfiðara fyrir.

Þetta er svo hátt „level“ og það er svo mikilvægt að spila þessa leiki til að læra inn á þetta „level“. Menn poppa ekkert inn í A-landslið og eru bara bestu leikmenn þess, nema þeir séu algjör „súpertalent“. Við höfum ekki átt marga súpertalenta í gegnum tíðina,“ sagði Arnar.