Borgaði 1,3 milljónir fyrir pottasett í eldhúsið

Sylvía Rut Sigfúsdóttir skrifar 24. ágúst 2021 16:31

Blökastið kemur út alla þriðjudaga. Þáttur dagsins er sá fyrsti sem kemur út sem myndband og verður það endurtekið reglulega. Blökastið

Í nýjasta þættinum af hlaðvarpinu Blökastinu barst umræðan af verstu kaupunum. Auðunn sagði að hvítur sófi væru hans ópraktísku kaup og Steindi viðurkenndi að ryksuga úr Walmart væru hans verstu innkaup. Það var þó deila um það hver verstu kaup Egils væru.

Egill sagði sjálfur að það hefðu verið mistök að eyða fermingarpeningunum í myndavél því hann notaði hana ekki einu sinni. Hann á því enga ljósmynd sem tekin var á þá vél. Þeir Auðunn og Steindi voru samt ekki sammála og sögðu að hans verstu kaup væru án efa pottasett sem hann verslaði fyrir nokkrum árum. Söguna má heyra í hljóðbrotinu fyrir neðan en þátturinn kemur út síðar í dag og geta áskrifendur þá hlustað á allan þáttinn.

„Pottarnir eru bestu kaup sem ég hef gert,“ þrætti Egill. „Ég þarf aldrei aftur að kaupa pott.“

Klippa: Keypti pottasett á raðgreiðslum í stað þess að afþakka tilboðið

Fékk fría pönnu fyrir kynninguna

Síðan þú keyptir pottana þína á sjö hundruð þúsund þá hef ég ekki heldur keypt pott, og það eru komin nokkur ár, bendir Auðunn á varðandi IKEA pottana sína og Steindi tekur undir.

„Það er eilífðarábyrgð á þessum pottum,“ heldur Egill áfram. Hann viðurkenndi þó að Ásgeir Kolbeins hafi aðeins farið illa með sig með þessu pottamáli.

„Hann sveik þig,“ segir þá Steindi.

Egill útskýrir að Ásgeir hafi boðið sér í matarboð ásamt öðru pari, sem hafi svo verið pottakynning.

„Ef annað hvort parið kaupir, þá færð þú „free shit,“ eins og auka pönnu eða rafmagnspönnu eða eitthvað.“

Hefði getað keypt heitan pott

Egill segir að í matarboðinu hafi verið almennileg kona með kynningu, en hitt parið hafi samt sagt nei strax og afþakkað þetta tilboð á eldhúspottum.

„Öll pressan fór yfir á mig,“ útskýrir Egill. „

Hvað átti ég að segja við konuna? Hún stóð yfir mér.“

Steindi bendir á að hann hafi vissulega ekki þurft að kaupa potta fyrir sjö hundruð þúsund. Svo kemur í ljós að kaupin voru mun dýrari þar sem Egill keypti pottana á raðgreiðslum.

„Ég dreifði þessu yfir á tólf ár, ég er nýbúinn að borga þetta.“

Egill segir að heildarverðið hafi verið 1,3 milljón.

„Þú hefðir getað keypt þér heitan pott,“ segir þá Auðunn hneykslaður.

Blökastið er áskriftarhlaðvarp með Audda, Steinda og Agli úr útvarpsþættinum FM95BLÖ. Þar fá aðdáendur útvarpsþáttarins fjóra auka þætti í mánuði í formi hlaðvarps, ásamt skemmtilegu aukaefni. Þættirnir koma út alla þriðjudaga og strákarnir verða einnig af og til í mynd og stundum í beinni útsendingu frá hinum og þessum stöðum.

Hver veit nema þeir geti loksins upplifað draum sinn og verið í beinni útsendingu frá Harrah´s hótelinu í Atlantic City. Maður má nú láta sig dreyma.

„Áskriftin kostar jafn mikið og einn bjór, eða einn bragðarefur, eða nokkur rakvélblöð. Svo það er engin afsökun að hlusta ekki,“ segja þeir um Blökastið.

Nánari upplýsingar má finna á síðu Blökastsins hér á Vísi.

FM95BLÖ