Kolbeinn hóf leik í fremstu víglínu Gautaborgar og lék við hlið sænska landsliðsmannsins Marcus Berg sem sneri nýverið aftur í sænska boltann eftir fjórtán ára fjarveru.

Mjallby komst yfir eftir tuttugu mínútna leik en á 39.mínútu jafnaði Kolbeinn metin með góðu skallamarki.

Í upphafi síðari hálfleiks komst Gautaborg í forystu þegar Kolbeinn skallaði boltann fyrir Marcus Berg sem kom á fleygiferð og stangaði boltann í netið af miklum krafti.

Mjallby svaraði og jafnaði í 2-2 áður en Alexander Jallow tryggði Gautaborg 3-2 sigur með marki á 83.mínútu. Boltinn barst til Jallow af Kolbeini og því önnur stoðsending íslenska sóknarmannsins staðreynd. Kolbeini var svo skipt af velli á 89.mínútu.

Markvörðurinn ungi, Adam Ingi Benediktsson, sat allan tímann á varamannabekk Gautaborgar.