Þetta kemur fram í frétt Austurfréttar, en það er upplýsingafulltrúi almannavarnadeildar ríkislögreglustjóra, Hjördís Guðmundsdóttir, sem staðfestir í samtali við vefinn að smit hafi komið upp á Austurlandi.
Almannavarnanefnd Austurlands kom saman til fundar klukkan 13 og verði frekari upplýsinga að vænta að fundinum loknum.
Á vefnum Covid.is kemur fram að tveir hafi verið í einangrun á Austurlandi í gær og þá hafi tveir verið í sóttkví.
Uppfært klukkan 17:04 með tilkynningu frá lögreglunni á Austurlandi að neðan
Tveir einstaklingar greindust smitaðir í fjórðungnum í gær, á Vopnafirði líkt og fram hefur komið í fjölmiðlum. Þeir tilheyra sömu fjölskyldu og höfðu verið í sóttkví frá kvöldi 26. maí.
Uppruni smitanna er þekktur og er ekki á Austurlandi heldur tengist ferðum viðkomandi utan svæðisins. Því er ekki talin hætta á að viðkomandi hafi smitað aðra. Aðgerðastjórn notar þó tilefnið og hvetur fólk eins og ávallt til að kynna sér vel gildandi sóttvarnareglur, virða þær í hvívetna og gæta sérlega vel að persónulegum sóttvörnum.
Síðast en ekki síst að ef einhver telur sig vera með einkenni að fara þá ekki til vinnu, í skóla eða annars staðar á meðal fólks og vera strax í sambandi við heilsugæslu eða síma 1700 og fá sýnatöku.
