Um 140 ís­lenskir ríkis­borgarar á á­hrifa­svæðum á­takanna

Lokuð loftrými, hættulegar landleiðir og sú staðreynd að engin íslensk sendiskrifstofa sé á svæðinu takmarki verulega getu borgaraþjónustunnar til að veita aðstoð umfram almennar ráðleggingar og upplýsingagjöf.

Þróunin er hröð í Miðausturlöndum þessa sólarhringa. Forsvarsmenn ísraelska hersins segja umfangsmiklar árásir hafa verið gerðar á opinberar byggingar í Tehran, höfuðborg Íran, í nótt. Hundruð herþotna eru sagðar hafa varpað rúmlega 250 sprengjum á byggingarnar.

Yfirlitsmyndir af Beirút í Líbanon sína til að mynda reykjarmökk hér og þar í borginni vegna loftárása Ísraelsmanna en skotmörkin eru Hezbollah-samtökin sem Íran styður. Stjórnvöld í Líbanon segja minnst 52 hafa látið lífið í árásunum og að 154 séu særðir. Hezbollah hefur á sama tíma staðið fyrir árásum á skotmörk í Ísrael.

Magnea Marinósdóttir alþjóðastjórnmálafræðingur segir erfitt að spá fyrir um hvert þróunin leiðir.

„Nú er alls búið að gera árásir á ein tíu ríki og það eru fyrst og fremst þau ríki þar sem Bandaríkjamenn eru með herstöðvar í; Kúveit, Sameinuðu arabísku furstadæmin, Barein og í Jórdaníu. Þeir hafa líka gert árás á bandaríska sendiráðið í Ríad í Sádi-Arabíu og í sambandi við það hvort það verði aukin stigmögnun eða önnur Arabaríki taki þátt í stríðsátökum þá hefur Sádi-Arabía lýst því yfir að það megi, þau megi svara fyrir sig.“

Stóra spurningin á þessum tímapunkti snúist um það hvort fleiri ríki blandist inn í átökin, annaðhvort taki þátt í að kynda undir ófriðarbálið eða reyni að slökkva í því.

„Bretar, Frakkar og Þjóðverjar hafa lýst því yfir að þeir muni veita Bandaríkjamönnum og Ísraelsmönnum stuðning en engin arabaríki fyrir utan Herzbollah-samtökin hafa gripið til vopna enda hafa líka Ísraelar að fyrra bragði ráðist inn í Líbanon.“