Kveðst hafa glatað 3,2 milljarða vinningsmiða í þvotti

Atli Ísleifsson skrifar 14. maí 2021 13:11

Vinningsupphæðin nam 26 milljónum Bandaríkjadala, um 3,2 milljarða króna. Myndin er úr safni. EPA

Kona í Bandaríkjunum sem fullyrðir að hún hafi keypt lottómiða með röð sem skilaði 26 milljóna dala vinningi, segir að hún hafi glatað miðanum eftir að hafa skilið hann eftir í buxnavasa og sett buxurnar í þvott. Vinningsupphæðin samsvarar um 3,2 milljörðum íslenskra króna.

Konan tók þátt í SuperLotto í Kaliforníu og keypti miða sinn í matvöruverslun í Norwalk, úthverfi Los Angeles í nóvember síðastliðinn.

BBC segir frá því að myndir úr öryggismyndavél verslunarinnar sýni að konan hafi sannarlega keypt lottómiða í versluninni, en frestur til að sækja vinninginn rann út í gær, hálfu ári eftir útdráttinn.

Haft er eftir starfsmanni verslunarinnar í Norwalk þar sem vinningsmiðinn var keyptur, að konan hafi heimsótt verslunina á miðvikudaginn og sagst vera hinn eini sanni vinningshafi. Konan hafi týnt miðanum og óttaðist að hún hafi fyrir mistök sett hann í þvott og miðinn þannig eyðst.

Talsmaður lottósins segir að myndskeið úr öryggismyndavélinni væri ekki nóg til að sanna að konan væri handhafi vinningsmiðans. Forsvarsmenn lottósins væru þó að rannsaka myndefnið nánar.

Fari svo að enginn fái vinningsupphæðina verður henni dreift milli skóla í Kaliforníu.

Vinningstölurnar í umræddu lottói voru 23, 36, 12, 31, 13 og svo ofurtalan 10.

Bandaríkin Fjárhættuspil

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.