Innlent

Ráðherra biður um frest og felur Haraldi skýrslugerðina

Kolbeinn Tumi Daðason skrifar
Haraldur Briem, fyrrverandi sóttvarnalæknir.
Haraldur Briem, fyrrverandi sóttvarnalæknir. Stjórnarráðið

Haraldur Briem fyrrverandi sóttvarnalæknir hefur fallist á beiðni heilbrigðisráðherra um að vinna skýrslu til Alþingis um breytingar á skipulagi og framkvæmd skimunar fyrir krabbameini í leghálsi hér á landi.

Gerð skýrslunnar er í samræmi við beiðni Alþingis þessa efnis að því er fram kemur á vef Stjórnarráðsins.

Skýrslubeiðendur óskuðu eftir því að skýrslan yrði unnin af óháðum aðila og varð niðurstaða Svandísar Svavarsdóttur heilbrigðisráðherra sú að leita til Haraldar um verkefnið.

Óskað hefur verið eftir framlengdum tímafresti á skilum skýrslunnar til þingsins en frestur til að skila skýrslunni rennur út í þessari viku. 

Haraldur var ritari skimunarráðs sem skilaði áliti til landlæknis í febrúar 2019 um staðsetningu, stjórn og framkvæmd skimana fyrir krabbameinum á Íslandi.

Svandís Svavarsdóttir heilbrigðisráðherra.Vísir/vilhelm

„Gert er ráð fyrir að hún verði tilbúin til afhendingar í lok fyrstu viku júnímánaðar,“ segir í tilkynningunni á vef Stjórnarráðsins.

Telur upplýsingarnar eiga að liggja fyrir

Alþingi samþykkti í byrjun mars skýrslubeiðni til heilbrigðisráðherra þar sem óskað var eftir að greint yrði frá öllum forsendum að baki þeirri ákvörðun að flytja greiningar á sýnum til Danmerkur. Í síðustu viku steig hver þingmaðurinn á fætur öðrum í pontu og bað forseta Alþingis um kanna hvernig vinnu miðar.

Hanna Katrín Friðriksson, þingflokksformaður Viðreisnar.Vísir/Vilhelm

„Ég hefði haldið að þessa skýrslu hefði bara verið hægt að prenta út. Vegna þess að þessar upplýsingar hefðu legið fyrir til grundvallar þessari vegferð. Það var aldeilis ekki svo,“ sagði Hanna Katrín Friðriksson, þingmaður Viðreisnar.

Ráðherra hefur lögum samkvæmt tíu vikna frest til að skila slíkri skýrslu og voru níu vikur liðnar í síðustu viku.

Segir öryggi kvenna í hættu

„Maður upplifir að það er óöryggi meðal kvenna með algjöra grundvallar heilbrigðisþjónustu. Okkur fannst mikilvægt að það yrði fenginn óháður aðili til að rýna forsendurnar og gögnin til þess að vinnan væri líkleg til þess að skapa traust aftur,“ sagði Þorbjörg Sigríður Gunnlaugsdóttir, þingmaður Viðreisnar, á þinginu í síðustu viku.

Þorbjörg Sigríður Gunnlaugsdóttir, þingmaður Viðreisnar.Vísir/Vilhelm

„Í dag held ég að við séum komin með vandann það mikið í fangið að það er ekki hægt að bíða eftir niðurstöðu skýrslu með aðgerðir. Ég held að heilbrigðisráðherra verði bara að taka ákvörðun um að þetta var ekki góð hugmynd og að við skulum framkvæma þessar rannsóknir hér á Íslandi,“ sagði Helga Vala Helgadóttir, þingkona Samfylkingarinnar.

„Öryggi kvenna er í hættu. Þeirra heilsa og öryggi er í hættu út af þessu klúðri.“


Tengdar fréttir

„Þetta er margs konar klúður“

Sérfræðingar sem komu fyrir velferðarnefnd í morgun lýstu yfir áhyggjum af stöðu skimana fyrir leghálskrabbameini, að sögn nefndarformanns. Hún segir breytingar á þjónustunni klúður sem stefni heilsu kvenna í hættu. Þingmenn ráku í dag á eftir skýrslu heilbrigðisráðherra um efnið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.