Hraunrennslið minnkar

Þetta er meðal þess sem kemur fram í stuttri tilkynningu frá jarðvísindastofnun Háskóla Íslands. Nýjustu gögn um hraunflæðið og stært hrauns eru byggðar á loftmyndum sem teknar voru á flugi í hádeginu í dag. Út frá myndunum eru unnin landlíkön af hrauni í Geldingadölum, Meradölum og uppi á Fagradalsfjalli, hvar nýjustu gígana er að finna.

„Niðurstöðurnar eru að heildarrennsli frá öllum gígum undanfarna fjóra sólarhringa hafi að meðalatali verið tæpir 5 m3/s. Þetta er nánast jafnt meðalrennsli frá upphafi. Svo virðist sem aukningin sem kom fram í síðustu viku, samhliða opnun nýrra gíga hafi verið fremur skammlíf. Flatarmál hrauns hefur vaxið hlutfallslega lítið síðustu sólarhringa, enda hefur kvikan sem komið hefur upp undanfarið að mestu farið í að auka þykkt hraunsins. Heildarrúmmál er nú rúmlega 10 millj. Rúmmetrar,“ segir í tilkynningunni.

Hér að neðan má sjá þrívíddarlíkan Náttúrufræðistofnunar af Geldingadölum, Meradölum og Fagradalsfjalli. Líkanið er unnið í samstarfi við Almannavarnir, Landmælingar Íslands og Háskóla Íslands.