Innlent

Vill opna sund­laug fyrir bólu­setta og segir „upp­gjafar­tón“ í sótt­varna­lækni

Vésteinn Örn Pétursson skrifar
Hildur segir um lýðheilsumál að ræða. Margir eldri borgarar stundi stóran hluta félagslífs og hreyfingar í sundi.
Hildur segir um lýðheilsumál að ræða. Margir eldri borgarar stundi stóran hluta félagslífs og hreyfingar í sundi. Vísir/Vilhelm

Hildur Björnsdóttir, borgarfulltrúi Sjálfstæðisflokksins, hyggst eftir helgi leggja fram formlega tillögu í borgarstjórn um að Reykjavíkurborg leiti leiða til að opna minnst eina sundlaug fyrir bólusettum eldri borgurum. Hún er ósammála sóttvarnalækni um að opnun gæti reynst erfið í framkvæmd.

Í Facebook-færslu sem birtist á síðu Hildar í morgun kveðst hún telja eðlilegt að borgin leitaði heimilda til að opna minnst eina sundlaug, helst þó fleiri, sem aðgengileg yrði bólusettum. Fleytir hún fram þeirri hugmynd að opnunartíma væri hægt að takmarka við nokkrar klukkustundir fyrir hádegi, hvern virkan dag.

Í samtali við Vísi segist Hildur ætla að leggja fram tillögu í borgarstjórn eftir helgi, þar sem hún muni kalla eftir því að borgin leitaði heimilda hjá sóttvarnayfirvöldum til þess að láta opnun minnst einnar laugar verða að veruleika.

„Sá hópur sem hefur fengið bólusetningu, meðal annars eldri borgarar og viðkvæmir hópar, er kannski sá hópur sem hefur hvað mest þurft að halda sig til hlés síðastliðið ár. Þannig að manni finnst sjálfsagt að létta aðeins á takmörkunum á þeim og gefa þeim aftur hluta af sinni rútínu og hversdegi til baka,“ segir Hildur.

Hún telji sundið skipta marga eldri borgara miklu, bæði hvað varðar hreyfingu og félagsskap. Í raun sé um lýðheilsumál að ræða.

Hildur segir viðbrögðin við hugmynd sinni í meginatriðum hafa verið góð.

„Kannski myndi einhver halda því fram að þarna sé um einhverskonar ójafnræði að ræða en þetta er auðvitað hópur sem er búinn að fá bólusetningu og á auðvitað að fá að njóta góðs af því. Svo held ég að flestir séu alveg tilbúnir að veita þessum hópi ákveðinn forgang.“

Hildur segir þá mikilvægt að nú sé unnið „aftur að opnara og frjálsara samfélagi.“ Í hennar starfi snúi það aðallega að skólastarfi, sem hélt áfram með eðlilegra sniði eftir páska, en einnig íþróttastarfi barna, sem Hildur kveðst vilja sjá fara í eðlilegt horf. Eins og stendur eru íþróttir barna og fullorðinna, inni og úti, sem krefjast meiri nálægðar en tveggja metra eða þar sem hætta er á snertismiti vegna sameiginlegs búnaðar, óheimilar.

Ósammála Þórólfi

Fyrr í þessari viku sagði Þórólfur Guðnason sóttvarnalæknir að erfitt gæti reynst að slaka á sóttvarnareglum fyrir tiltekinn hóp, í umræðum um tilslakanir fyrir bólusetta eldri borgara. Slíkt hefði verið reynt erlendis og yfirvöld þar hefðu lent í vandræðum.

Kvaðst hann ekki telja líklegt að farið yrði í slíkar aðgerðir hér á landi og að erfitt gæti orðið að fylgja slíkum reglum eftir.

Hildur er ósammála sóttvarnalækni og telur opnun sundlaugar fyrir bólusetta vel framkvæmanlega.

„Mér finnst bara hálfgerður uppgjafartónn í því. Ég held að það sé ekki sérlega erfitt í framkvæmd að biðja fólk annað hvort að framvísa bólusetningarskírteini eða hreinlega, ef við værum bara að horfa á eldri borgara, skilríkjum,“ segir Hildur og bætir við að hún efist um að óbólusettir eldri borgarar myndu hætta sér í sund.

„Ég held að við þurfum bara að treysta fólki og setja einfaldar reglur um framvísun vottorða eða skilríkja. Ég held að það sé ekki flókið í framkvæmd og ef viljinn er fyrir hendi þá finnum við leiðir,“ segir Hildur.


Tengdar fréttir

Sér­reglur fyrir á­kveðna hópa erfiðar í fram­kvæmd

Ekki hefur verið skoðað sérstaklega að slaka á sóttvarnareglum fyrir fólk sem hefur verið bólusett gegn kórónuveirunni, að sögn sóttvarnalæknis. Hann telur að sérreglur fyrir bólusetta eða þá sem hafa fengið Covid-19 erfiðar í framkvæmd og eftirliti.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×