Versta byrjun Íslands í undankeppni í rúm 26 ár

Íslenska karlalandsliðið í knattspyrnu er hvorki með stig eða mark eftir tvo fyrstu leiki sína í undankeppni HM 2022. Það þarf að fara langt aftur í tímann til að finna svo slaka byrjun á undankeppni stórmóts.

Íslensku strákarnir fylgdu eftir 3-0 tapi á móti Þýskalandi með því að tapa 2-0 á móti Armeníu í gærkvöldi. Nýju landsliðsþjálfararnir eru að byrja í miklu mótlæti en hvorki Arnar Þór Viðarsson né Eiður Smári Guðjohnsen voru sjálfir búnir að spila fyrir A-landsliðið þegar íslenska landsliðsins fór síðast jafn illa af stað í undankeppni EM eða HM.

Það þarf nefnilega að fara alla leið til haustsins 1994 til að finna eins slaka byrjun hjá karlalandsliðinu, það er undankeppni sem byrjar stigalaus og markalaus í fyrstu tveimur leikjunum.

Undankeppnin sem um ræðir er fyrir EM 1996 í Englandi. Íslensku strákarnir töpuðu þá 1-0 á heimavelli á móti bronsliði Svía frá HM í Bandaríkjunum fyrr um sumarið en steinlágu svo 5-0 á útivelli á móti Tyrkjum í leik tvö.

Íslenska liðið vann á endanum bara einn af átta leikjum sínum í þessari undankeppni og endaði í neðsta sæti riðilsins á eftir Sviss, Tyrklandi, Svíþjóð og Ungverjalandi. Ásgeir Elíasson hætti sem þjálfari íslenska liðsins eftir undankeppnina.

Eins og sjá má hér fyrir neðan þá er þetta samt langt frá því að vera eina skiptið á þessum tíma þar sem liðið tapar fyrstu tveimur leikjum sínum. Það hafði hins vegar ekki gerst í síðustu fjórum undankeppnum eða síðan að Lars Lagerbäck mætti á svæðið.