Innlent

Leigja hótel og skikka fólk af eldrauðu svæðunum í sóttvarnahús

Kolbeinn Tumi Daðason skrifar
Svandís ræddi tillögurnar við fréttamenn fyrir utan Ráðherrabústaðinn í morgun.
Svandís ræddi tillögurnar við fréttamenn fyrir utan Ráðherrabústaðinn í morgun. Vísir/Vilhelm

Ríkisstjórnin samþykkti á fundi sínum í morgun tvær tillögur sóttvarnalæknis um aðgerðir er tengjast landamærunum og kórónuveirufaraldrinum.

Börn munu nú einnig fara í sýnatöku við komuna til landsins og þá munu þeir sem koma frá eldrauðu svæðunum í Evrópu dvelja dagana fimm fram að seinni skimun í sóttvarnarhúsi.

Þetta kom fram í máli Svandísar Svavarsdóttur heilbrigðisráðherra við Ráðherrabústaðinn rétt í þessu.

Til að geta tekið við öllu þessu fólki stendur til að taka hótel og fleiri rými á leigu. Hve mörg þau verða liggur ekki fyrir.

Svandís reiknar með því að reglugerðin um börnin taki gildi strax á morgun en breytingin varðandi rauðu svæðin og sóttvarnahús um leið og húsnæði verður tilbúið.

Bæði Íslendingar og erlendir ríkisborgarar sem koma frá verst settu löndunum hvað veiruna varðar þurfa að fara í sóttvarnahús. Dæmi um slík lönd í dag eru Pólland og Ungverjaland að sögn Svandísar auk fleiri landa.

Í tilkynningu frá heilbrigðisráðuneytinu kemur fram að meginreglan verði sú að börn fædd 2005 eða síðar fari í sýnatöku á landamærum og sæti fimm daga sóttkví. 

Allir þeir sem koma frá löndum þar sem nýgengi smita er yfir 500 á hverja 100.000 íbúa undanfarna fjórtán daga dvelji í sóttvarnahúsi meðan á fimm daga sóttkví stendur nema þeir hafi framvísað gildu bólusetningarvottorði eða vottorði um fyrra smit. Það sama gildir um fólk sem kemur frá löndum þar sem skortir upplýsingar um nýgengi smita.

Reglugerðin tekur gildi 1. apríl og gildir til loka þess mánaðar.

Mörg dæmi um jákvæð sýni í seinni skimun

Núverandi fyrirkomulag á landamærum hljóðar upp á að komið sé með neikvætt vottorð, farið í sýnatöku við komu og svo aftur fimm dögum síðar með sóttkví á milli. Dæmi eru um að fólk virði ekki sóttkvína á milli sýnataka.

„Við erum að sjá svo mörg dæmi um að það eru að koma jákvæð sýni í seinni skimun,“ segir Svandís. 

Þetta kort á vef Evrópsku sóttvarnarstofnunarinnar er frá 18. mars. Það uppfærist á tveggja vikna fresti.

Áhyggjur hafa verið af því að fólk ferðist mögulega á milli landa í aðdraganda þess að flogið sé til Íslands frá svæði sem sé ekki eldrautt. Svandís segir erfitt að koma í veg fyrir það. Aðgerðirnar byggi áfram að stóru leyti á því að treysta fólki. Ekki sé hægt að rekja ferðir hvers og eins. 

Tilbúin að grípa inn í með skömmum fyrirvara

Svandís nefndi jafnframt að Þórólfur Guðnason sóttvarnalæknir væri með minnisblað tilbúið ef grípa þurfi til aðgerða innanlands með skömmum fyrirvara.

„Við munum hafa hraðar hendur ef til þess kemur,“ segir Svandís. Tölurnar í dag hafi sem betur fer verið góðar en einn greindist smitaður innanlands í gær og var í sóttkví.

„Ef útlit er fyrir nýja bylgju verður brugðist hratt við.“

Fréttin hefur verið uppfærð.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.