Fótbolti

Kagawa verður samherji Sverris Inga

Ingvi Þór Sæmundsson skrifar
Shinji Kagawa fagnar marki fyrir Manchester United.
Shinji Kagawa fagnar marki fyrir Manchester United. getty/Michael Regan

Japanski fótboltamaðurinn Shinji Kagawa er genginn í raðir gríska úrvalsdeildarliðsins PAOK þar sem hann verður samherji Sverris Inga Ingasonar. Kagawa skrifaði undir eins og hálfs árs samning við PAOK.

Kagawa, sem er 31 árs, er hvað þekktastur fyrir tíma sinn hjá Borussia Dortmund og Manchester United. Hann varð tvisvar sinnum þýskur meistari og tvisvar sinnum bikarmeistari með Dortmund og einu sinni Englandsmeistari með United.

Japanski landsliðsmaðurinn lék með Dortmund 2010-12 en fór svo til United. Þar var hann í tvö ár áður en hann gekk aftur í raðir Dortmund. 

Kagawa lék sem lánsmaður með Besiktas í Tyrklandi 2019 og á síðasta tímabili var hann hjá Real Zaragoza í spænsku B-deildinni.

Sverrir hefur leikið með PAOK undanfarin tvö ár. Hann kom til gríska liðsins frá Rostov í Rússlandi í febrúar 2019.

PAOK er í 4. sæti grísku úrvalsdeildarinnar með 36 stig.




Fleiri fréttir

Sjá meira


×