Strekkingur, bjart með köflum og stöku él

Sunna Kristín Hilmarsdóttir skrifar 27. janúar 2021 07:10

Það verður frostlaust með suður- og vesturströndinni en annars talsvert frost, einkum í innsveitum norðantil. Vísir/Vilhelm

Það verður austlæg átt í dag, víða strekkingur, allhvöss eða hvöss syðst og á Vestfjörðum en mun hægari austanlands. Þá verður bjart með köflum en stöku él úti við sjávarsíðuna.

Þetta kemur fram í hugleiðingum veðurfræðings á vef Veðurstofu Íslands. Þar segir að vindur verði heldur hægari á morgun og að þá létti víða til.

Á föstudag nálgast síðan lægðardrag vesturhelming landsins og fer að snjóa þar um kvöldið. Þá ver spáð austan- og norðaustanáttum um helgina með slyddu eða snjókomu í flestum landshlutum.

Það verður frostlaust með suður- og vesturströndinni en annars talsvert frost, einkum í innsveitum nyrðra.

Veðurhorfur á landinu:

Austan og norðaustan 10-18 m/s, hægari norðlæg átt A-lands. Dálítil él á N-verðu landinu, en annars bjart með köflum. Austlæg átt, 8-15 m/s eftir hádegi, en allt að 18 m/s syðst og á Vestfjörðum. Mun hægari vindur eystra. Birtir víða til síðdegis, en stöku él við sjávarsíðuna.

Austan 8-15 m/s og víða léttskýjað á morgun, hvassast syðst, en skýjað úti við N- og A-ströndina. Frost 1 til 15 stig, kaldast í innsveitum fyrir norðan.

Á fimmtudag:

Austan 8-15 m/s S-til á landinu, hvassast með ströndinni, en annars hæg breytileg átt. Yfirleitt bjartviðri, en skýjað með A-ströndinni og frost 0 til 10 stig, minnst syðst.

Á föstudag:

Suðaustan 8-15 m/s SV-til, lítilsháttar slydda og hiti kringum frostmarki, en annars hægir vindar, bjartviðri og talsvert frost. Gengur í norðaustanstrekking og fer að snjóa NV-til um kvöldið.

Á laugardag:

Fremur hæg suðlæg átt, lítilsháttar rigning eða slydda á víð og dreif og hiti kringum frostmark, en ákveðin norðan- og norðaustanátt með snjókomu og vægu frost NV-lands.

Á sunnudag:

Austan- og norðaustanátt með slyddu eða rigningu og frostleysi syðst á landinu, en annars hægir vindar, stöku él og vægt frost.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.