Tólf látist af völdum svínaflensu á Indlandi

Að minnsta kosti tólf hafa látist af völdum svínaflensu á Indlandi það sem af er þessum mánuði og yfir hundrað eru sýktir.

Þetta er í annað sinn sem svínaflensufaraldur geysar í landinu en árið 2009 létust hátt í fimmhundruð manns og að minnsta kosti þrettán þúsund urðu mjög veikir af völdum flensunnar.

Ekki er vitað hvar flensan hafi átt upptök sín í þetta sinn en indversk heilbrigðisyfirvöld reyna nú að átta sig á því af hverju hún hefur gert vart við sig á ný. Mikill viðbúnaður er í þeim ríkjum sem flensan hefur komið upp en heilbrigðisyfirvöld hafa beðið landsmenn um að halda ró sinni og segjast geta haldið faraldrinum í skefjum.

Svínaflensan greindist fyrst í Mexíkó og Bandaríkjunum í apríl 2009 en breiddist fljótt út um allan heim. Rúmlega 17.000 manns létust af hennar völdum og fjölmargir veiktust, þar af nokkrir hér á Íslandi, en það var í ágúst árið 2010 sem Alþjóðaheilbrigðismálastofnunin lýst því yfir að svínaflensufaraldrinum væri lokið. Þrátt fyrir það hafa tilfelli greinst víðs vegar um heiminn frá þeim tíma.