Nadine Kessler besta knattspyrnukona heims

Nadine Kessler, leikmaður VfL Wolfsburg og þýska landsliðsins, var í kvöld kosin besta knattspyrnukona heims árið 2014 en hún fékk verðlaunin afhent í uppskeruhófi FIFA.

Nadine Kessler hafði betur gegn þeim Mörtu frá Brasilíu og Abby Wambach frá Bandaríkjunum sem voru einnig tilnefndar að þessu sinni.  Marta varð í öðru sæti í kjörinu.

Nadine Kessler var að vinna þessi verðlaun í fyrsta sinn en Marta hafði fimm sinnum verið kosin best í heimi og Abby Wambach einu sinni.

Kessler er 26 ára gömul og spilar sem sóknarmiðjumaður með Evrópumeisturum VfL Wolfsburg en þýska liðið vann Meistaradeildina annað árið í röð síðasta vor.

Þetta er annað árið í röð sem þýskur leikmaður vinnur þessi verðlaun en markvörðurinn Nadine Angerer vann í fyrra.