Lögregla gerir rassíu í Rio De Janeiro fyrir HM

Hátt í 1.500 lögreglumenn og landgönguliðar yfirtóku fátækrahverfi í Rio de Janeiro fyrir hádegi á sunnudag. Yfirtakan er hluti af aðgerðaáætlun sem stuðla á að öryggi í borginni fyrir HM í fótbolta í sumar.

Nú hafa fimmtán hverfi bæst í hóp þeirra sem hafa verið numin af yfirvöldum í þeim tilgangi að uppræta eiturlyfjagengi, en þau hafa haft völd í fátækrahverfum í Brasilíu í áratugi.

Friðaraðgerðir af þessu tagi hófust árið 2008 en síðan þá hafa lögreglumenn átt í ítrekuðum útistöðum við meðlimi gengjanna.

Skiptar skoðanir eru um aðgerðirnar. Margir telja tímabært að stöðva ofbeldi en aðrir segja að þungvopnaðir lögreglumenn veki frekar ugg en öryggistilfinningu.