Lyon hóf titilvörnina með sigri

Lyon, sem gerir nú atlögu að sínum sjöunda Frakklandsmeistaratitli í röð, tók á móti Auxerre á heimavelli sínum í gær. Gestirnir sem náðu áttunda sæti í deildinni á síðasta tímabili voru nálægt því að ná forystunni á 12. mínútu en aukaspyrna Benoit Pedretti hafnaði í stönginni. Sidney Govou misnotaði dauðafæri fyrir Lyon skömmu síðar en heimamenn náðu hins vegar forystunni á 33. mínútu. Jérémy Toulalan kom boltanum á Milan Baros og sá tékkneski skoraði fyrsta markið. 1-0 fyrir Lyon. Heimamenn bættu við öðru marki eftir 70 mínútna leik. Varnarmistök Auxerre liðsins urðu til þess að Govou fékk boltann og sendi hann á hinn 19 ára gamla Karim Benzema sem skoraði og tryggði Lyon 2-0 sigur.

Í Le Mans tóku heimamenn á móti Metz. Gestirnir í Metz sem endurheimtu sæti sitt í úrvalsdeildinni í vor hefðu átt að taka forystu eftir 17 mínútna leik en Laurent Agouazi hitti ekki markið úr ákjósanlegu færi. Gestunum var refsað fyrir þessi mistök 10 mínútum síðar. Stephane Sessegnon átti frábæra sendingu og serbneski varnamaðurinn Marko Basa afgreiddi boltann í netið með frábæru skallamarki. Þrátt fyrir yfirburði heimamanna voru gestirnir í Metz nálægt því að jafna metin á lokamínútunni en enn og aftur var það Agouazi sem misnotaði gullið tækifæri og lokatölur 1-0 fyrir Le Mans.