Falcao fékk meðmæli Terry og Cahill

Jose Mourinho, knattspyrnustjóri Chelsea, segir að hann hafi ákveðið að semja við kólumbíska sóknarmanninn Falcao eftir að kappinn fékk góð meðmæli frá miðvörðunum John Terry og Gary Cahill.

Falcao átti fremur erfitt uppdráttar í búningi Manchester United á síðustu leiktíð en Mourinho ákvað engu að síður að fá hann að láni frá franska liðinu Monaco.

Falcao spilaði gegn Chelsea í apríl og þó svo að hann hafi ekki skorað átti Falcao stangarskot í leiknum og var hættulegur að sögn varnarmannanna tveggja.

„Ég hef horft nokkrum sinnum á leikinn við Manchester United. Ég ræddi við John og Cahill um hann og við teljum að hreyfigetan er til staðar. Hann getur skapað sér pláss í teignum til að skora mörk,“ sagði Mourinho við enska fjölmiðla.

„Leikmönnum okkar fannst erfitt að stjórna honum og okkur finnst að hann geti þetta enn þá. Við skulum sjá hvort að sjálstraustið eykst hjá honum og hvort hann verði ánægðari.“