Á batavegi eftir heilaétandi amöbu

Hin 12 ára gamla Kali Hardig er á batavegi eftir að það uppgötvaðist að heilaétandi amaba hefði komið sér fyrir í höfði stúlkunnar. Talið er að stúlkan hafi komist í snertingu við slímdýrið í júlí þegar hún stakk sér til sunds í garði einum í Little Rock í Arkansas.

Af þeim 128 einstaklingum í Bandaríkjunum sem sýkst hafa af amöbutegundinni á árunum 1962 til ársins 2012, er Kali einungis önnur sem lifir af.

Móðir stúlkunnar sagði í samtali við NBC fréttastofuna að Kali ætti í erfiðleikum með talmálið en að hún gæti myndað nokkur orð, þar á meðal já, nei, mamma og pabbi.

Læknar segja ástand Kali stöðugt en hún hefur þurft að dvelja í nokkrar vikur í öndunarvél á gjörgæsludeild. 

Hin lífshættulega amöbutegund, Naegleria fowleri, lifir í heitu vatni og kemst inn í líkamann í gegnum nef manna. Þaðan þræðir hún sig svo upp að heilanum og ræðst á hann með því að éta upp heilafrumurnar. 

Kali var lögð inn á barnaspítalann í Arkansas hinn 19. júlí með háan hita og uppköst. Læknar komust fljótt að því hvað væri að hrjá hana og hófu strax meðferð. Hún fékk sveppadrepandi lyf sem drógu úr bólgum í heila og í kjölfarið var henni gefið tilraunalyfið Miltefosine, sem upprunlega var þróað sem lyf gegn brjóstakrabbameini.

Læknar segja að niðurstöðurnar sýni engin ummerki um að slímdýrið sé lengur að finna í líkama stúlkunnar. Þeir vita þó ekki hvort tilraunalyfið hafi gert gæfumuninn en ungur drengur, sem einnig var sýktur af amöbutegundinni, lést nýverið þrátt fyrir að hafa fengið lyfið.



Það er vefurinn Livescience sem greinir frá.