Hættulegar vinabeiðnir á Facebook

Rannsóknarmenn við háskólann í Bresku Kólumbíu sýndu fram á að auðveldlega megi stela persónuupplýsingum af samskiptasíðunni Facebook.

Með því að nota svokallaða félagsbotta tókst rannsóknarmönnunum að nálgast gríðarlegt magn upplýsinga. Í yfirlýsingu sögðu stjórnendur Facebook að niðurstöður rannsóknarinnar væru ofmetnar og siðlausar.

Tölvuglæpamenn nota félagsbotta í sífellt meira mæli og selja persónuupplýsingarnar hæstbjóðanda.

Félagsbottar stjórna tilbúnum prófílum á Facebook og senda í gegnum þá upplýsingar og myndir. Forritið sendir síðan vinaumsóknir í gervi venjulegs Facebook-notenda.

Alls samþykktu 3.055 af 8.570 notendum Facebook vinabeiðni félagsbottanna.

Í niðurstöðum rannsóknarmanna kemur fram að notendur með marga vini á Facebook eru mun líklegri til að samþykkja vinabeiðni forritsins.