Casillas hefur haldið hreinu í 82 landsleikjum

Iker Casillas hefur verið aðalmarkvörður spænska landsliðsins í mörg ár en þessi 31 árs kappi á að baki 141 leik. Hann hefur sett fjöldamörg met, bæði með félagsliði sínu og landsliði.

Þetta kemur fram á vefmiðlum Goal.com en þar eru teknar saman nokkrar staðreyndir um Casillas sem spilaði sinn fyrsta landsleik fyrir rúmum tólf árum síðan.

Hann var á ný í marki Spánar í 4-0 sigri á Hvíta-Rússlandi á föstudag. Í leiknum setti hann met því hann hefur nú ekki fengið mark á sig í 727 mínútur. Hann átti sjálfur gamla metið.

Reyndar hefur enginn markvörður í sögunni haldið jafn oft hreinu í landsleikjum. Casillas hefur alls haldið hreinu í 82 landsleikjum en næstur á eftir kemur Hollendingurinn Edwin van der Sar sem hélt hreinu í alls 72 landsleikjum á sínum ferli.

Á EM í sumar varð hann fyrsti leikmaður Spánar til að vinna 100 landsleiki á ferlinum. Hann hélt svo hreinu í 509 mínútur í röð á mótinu sem er nýtt Evrópumet.

Casillas hefur verið fyrirliði Spánar síðustu árin og lyft Evrópubikarnum tvisvar (2008 og 2012) og heimsmeistarabikarnum einu sinni (2010). Hann hefur alls varið sex vítaspyrnur í úrslitakeppnum stórmóta.

Af núverandi leikmönnum Real Madrid hefur enginn unnið jafn marga titla og Casillas. Hann hefur orðið spænskur meistari fimm sinnum og Evrópumeistari tvívegis.

Aðeins þrír leikmenn í sögu Real Madrid eiga fleiri leiki að baki en Casillas. En markvörðurinn öflugi er ekki nema 31 árs gamall og ekki útlit fyrir annað en að hann eigi nóg eftir.