Stal fermingarpeningum og var handtekin

Lögregla á Fjóni handtók um helgina 35 ára gamla konu sem gert hafði sér lítið fyrir og stolið 9.000 dönskum krónum, jafnvirði um 200.000 íslenskra, í fermingarveislu sem hún var gestur í. Peningunum var stolið af gjafaborði fermingarbarnsins og varð þess fljótlega vart að þeir voru horfnir auk þess sem einn gestanna hafði látið sig hverfa formálalaust. Konan yfirgaf veisluna í leigubíl og var haft samband við lögreglu sem óskaði eftir samvinnu leigubílastöðvar bæjarins. Þetta leiddi til þess að konan var handtekin skömmu síðar og á nú von á kæru frá foreldrum fermingarbarnsins.