Lagerbäck: Ekki mistök hjá Hannesi | Eggert þarf nýtt félag

Lars Lagerbäck, landsliðsþjálfari Íslands, var sársvekktur með 2-0 tapið gegn Svisslendingum í undankeppni heimsmeistaramótsins í knattspyrnu í kvöld. Sá sænski hrósaði leikmönnum Íslands en vill meiri skilvirkni við mark andstæðinganna.

„Þú getur sætt þig við tap ef hitt liðið er miklu betra. Við vorum of passívir í fyrri hálfleik en færðum okkar framar í seinni. Miðað við færin í seinni áttum við jafntefli skilið," sagði Svíinn sem hrósaði leikmönnum sínum en minnti á að það væru mörkin sem teldu.

„Við fengum þrjú opin færi í seinni hálfleik auk skyndisókna og aukaspyrnu Gylfa í fyrri. Sviss var kannski betri aðilinn í fyrri hálfelik en Hannes þurfti aldrei að verja," sagði Lagerbäck sem telur íslenska liðið helst geta bætt sig í færanýtingu í opnum leik. Varnarleikurinn sé góður sem og frammistaða í föstum leikatriðum í vörn sem sókn.

Eggert þarf að finna sér liðEin breyting var gerð á byrjunarliði Íslands frá tapinu gegn Albönum. Eggert Gunnþór Jónsson kom inná miðjuna fyrir Aron Einar Gunnarsson sem var í leikbanni. Eggert átti góðan fyrri hálfleik en átti erfitt uppdráttar í þeim seinni þegar sendingar rötuðu iðulega á mótherja.

„Maður sér að Eggert hefur spilað lítið en hann stóð sig vel. Það var áhætta að setja mann í litlu leikformi inn. Með það í huga stóð hann sig vel. Hann þarf þó að finna sér nýtt lið til að fá að spila," sagði Lagerbäck en tækifæri Eggerts hjá Wolves hafa verið af skornum skammti.

Hannes Þór gerði slæm mistök í fyrsta marki Svisslendinga en landsliðsþjálfarinn sagði markvörðinn þó hafa verið aðþrengdann og ekki víst að um mistök hefði verið að ræða.

„Það var mikil barátta og Svisslendingar gerðu vel í að setja upp hindranir. Frá mínu sjónarhorni var ekki um mistök hjá Hannesi að ræða. Við komum boltanum ekki í burtu og komumst fyrir tvö eða þrjú skot áður en markið var skorað."

Um seinna mark Svisslendinga sagði Svínn:

„Þá vorum við búnir að setja einn mann framar og þeir fengu skyndisókn. Við tókum áhættu og fengum á okkur mark."

Þrír í banni í SlóveníuAuk Eggerts fengu Emil, Grétar Rafn, Kári og Rúrik spjöld í leiknum. Þeir þrír síðastnefndu verða í banni gegn Slóvenum í mars vegna tveggja áminninga.

„Við megum ekki fá óþarfa gul spjöld. Við megum ekki fórna okkur í tæklingar sem gætu uppskorið gult spjald nema í námunda við teiginn. Við þurfum að vera skynsamari í þeim efnum," sagði Lagerbäck en taldi þó erfitt að sakast við áminntu leikmennina í leiknum í kvöld.

Lagerbäck sagði innkomu Arons Einars og Kolbeins Sigþórssonar þó styrkja liðið og gefa því aukan möguleika í framhaldinu. Hann ítrekaði þó vonbrigði sín með úrslitin.

„Já, það er svekkjandi að fara inni í hléð (næsti keppnisleikur 22. mars gegn Slóveníu) með svona tap á bakinu. Við eigum æfingaleik í nóvember (gegn Andorra) sem er gott. Vonandi fáum við æfingaleik í febrúar. Það hefur ekki verið gengið frá því en vonandi tekst það."