Vítishraðbrautin vinsæl við jarðarfarir

Ástralar eru þjóðlegir þegar kemur að hinstu kveðjunni og velja nú í auknum mæli innlenda tónlist við kveðjuathöfnina.

Það er Highway to Hell með áströlsku rokksveitinni AC/DC sem er á hraðri siglingu upp vinsældalistann þar í landi sem útfararsálmur. Talsmenn stærstu útfararþjónustunnar í borginni Adelaide segja að mörg óhefðbundin lög virki í raun mjög vel við jarðarförina þar sem yfirleitt túlki þau persónu hins látna hvað best - enda valin af honum eða henni.

Rokkararnir gömlu í AC/DC eru þó ekki nálægt því að velta Frank Sinatra úr sessi sínum í toppsæti vinsældalistans en hann syngur lagið My Way við flestar ástralskar útfarir. Nú er svo komið að aðeins tveir eiginlegir sálmar eru meðal tíu vinsælustu útfarartónverkanna og eiga þeir í vök að verjast meðal laga eftir Monty Python og Led Zeppelin.

Hér má geta þess að fréttaneytandi hafði samband við ritstjórn Vísis og kvaðst hafa áreiðanlegar heimildir fyrir því að Bretar létu Simpy Red gjarnan syngja sig til hinstu hvílu með laginu If you don't know Me by now og stakk að auki upp á því að Íslendingar gripu til lagsins Komdu og skoðaðu í kistuna mína við útfarir sínar.