Bandarískur hermaður skaut fimm félaga sína til bana

Pentagon greinir frá því í kvöld að bandarískur hermaður hafi skotið fimm félaga sína til bana á herstöð í Bagdad í Írak. Tveir til viðbótar særðust í skotárásinni en byssumaðurinn hefur verið settur í varðhald. Í yfirlýsingu frá hernum segir að árásin hafi átt sér stað á Camp Liberty herstöðinni nálægt flugvellinum í Bagdad um tvö leytið í dag.

Hvíta húsið segir að Obama forseta hafi verið mjög brugðið vegna þessa „hræðilega harmleiks". Hann gerir ráð fyrir að ræða málið við varnamálaráðherrann sagði talsmaður Hvíta hússins.

Skotárásin átti sér stað læknastöð þar sem hermenn sækja aðstoð vegna persónulegra mála eða svokallaðrar „bardaga-streitu".

Þetta er ekki í fyrsta skipti sem bandarískur hermaður skýtur á félaga sína á síðari árum. Einn hermaður hlaut dauðarefsingu eftir að hann skaut tvo hermenn til bana og særði fjórtán árið 2005 í Kúveit.