LA Galaxy nýtir sér "Beckham-regluna"

Sparkspekingar og íþróttafréttamenn í Bandaríkjunum hafa margir hverjir sett stórt spurningamerki við það hvernig félag í þessari litlu grein á Bandaríkjamarkaði fari að því að greiða knattspyrnumanni 250 milljónir dollara fyrir fimm ára samning.

Þau 13 lið sem spila í úrvalsdeildinni, MLS, í Bandaríkjunum eru þannig hvert og eitt með launaþak upp á litlar 2,1 milljón dollara á ári fyrir 18 manna leikmannahóp. Þó aðeins örlítið brot tekna Beckham komi í formi hefðbundinna launa, er maður sem var með 7,7 milljónir dollara í laun hjá Real Madrid auðvitað líklegur til að sprengja þann skala. Við þessu hefur verið brugðist í deildinni með því að koma á fót undantekningu á launaþaksreglunni sem kölluð er "Beckham-reglan" - regla sem gerir hverju félagi kleift að greiða einum leikmanni óháð launaþakinu.

Spilar fyrir lúsalaun

"Meginþorri þeirra tekna sem Beckham vinnur sér inn á samningstímanum eru óháðar samningi hans sem leikmaður LA Galaxy, " sagði Ivan Gazidis, næstæðsti maður MLS deildarinnar. "Mestur peningurinn kemur frá umboðsskrifstofu leikmannsins og frá auglýsingasamningum sem koma deildinni ekkert við. Það er greinilega mál manna hjá fyrirtæki þeirra (Beckham-hjóna) að koma þeirra til Bandaríkjanna geti þýtt mikla tekjuaukningu í kring um sölu á ýmsum varningi tengdum Beckham og það nær langt út fyrir knattspyrnuna," sagði Gazidiz.

Beckham-hjónin í raunveruleikasjónvarp?

Gazidiz var svo spurður að því hvernig hann teldi að Beckham næði að vinna sér inn þessa gríðarlegu fjárhæð á samningstímanum. "Vegur knattspyrnunnar hér í landi hefur nú verið ansi grýttur hingað til, svo maður setur auðvitað spurningamerki við þessar tölur. Ætli hann skelli sér ekki bara í raunveruleikasjónvarpið. Sú staðreynd að ég myndi þekkja hann á skjánum þó hann hafi aldrei spilað í Bandaríkjunum segir sína sögu um það hve stórt nafn hann er - og í raun er hann stærra nafn en fótboltinn sjálfur."