Bush harðlega gagnrýndur í þinginu

Þingmeirihluti demókrata í báðum deildum bandaríska þingsins gagnrýnir harðlega áætlun Bush forseta um að fjölga í herliði Bandaríkjamanna í Írak. Þeir segja ákvörðun forsetans ganga á svig við vilja almennings og ráðleggingar æðstu hershöfðingja.

"Þegar hann kýs að bæta í stríðið, stendur forsetinn einn," sagði Harry Reid, þingflokksformaður öldungadeildarþingmanna demókrata, í ræðu í þinginu í dag. Hann lofaði hins vegar að íhuga áætlunina og kynna sér hana í þaula.

Óljóst er hversu langan tíma þessi hernaðaruppbygging Bandaríkjamanna mun taka í Írak og hversu lengi Bandaríkjaher mun dvelja í Írak. Robert Gates sagði hins vegar í dag að fljótlega kæmi í ljós hvort Bandaríkjamenn stæðu við sinn hluta samningsins og styrktu sínar öryggissveitir.  

Flokksbræður Bush hafa einnig lýst vantrú á fyrirætlanir hans í Írak. Í gær höfðu sjö öldungadeildarþingmenn lýst því yfir að þeir styddu ekki fjölgun hermanna í Írak.